UCL khel tur zawnnaah United-in Villa an hneh

Manchester United-in Michael Carrick hnuaiah harhtharhna dik an chang a, an khelh ṭhat bakah result ṭha an hlawh chhuah avangin season thara Champions League khel turin an dinhmun a ṭha ta hle. Pathianni zan khan Man United hian Aston Villa 3-1 in an hneh a, Premier League-ah pathumnaah dinhmun an sawhnghet.

Old Trafford-a inkhelah United tana Casemiro goal hmahruai chu Villa-in Ross Barkley hmangin sut mah se mualneitu lamin Matheus Cunha leh substitute Benjamin Sesko te hmangin an khung belh. Inkhelh hmain United leh Villa te hian point 51 ve ve an hmu a, inkhelh zawhah pathumna leh palinaah awm chhunzawm mah se Carrick-a hote hi point thumin an hmu tam ta zawk.

Casemiro a hlu

Man United-in Casemiro contract an pawtsei tawh dawn lo a, Brazilian midfielder hi tun season tawpah a chhuak dawn. Tuna a khelh dan thlir chuan kum khat tal chelh atan pawh United thuneituten an duh ngei ang a, mah se engkim a tih fel tawh avangin Casemiro tan 'United legend' nichunga chhuah a ṭha tawh zawk.

Kum 34 mi Casemiro hi Ruben Amorim-a'n chhawr duh loh lai a nei a, tunah erawh Michael Carrick hnuaiah midfield khaipa ber a ni. Brazilian midfielder hian Villa lakah 88% pass accuracy a nei a, tackle vawi li a neih a hlawhtling vek a, inkhel an thununna kawngah a pawimawh takzet.

First half-ah goal a luh loh hnuah Casemiro-a'n minute 53-naah Bruno Fernandes-a corner pet chu ṭha zetin a tauh lut a, Villa keeper Emi Martinez tan pawh dan theih a ni lo. Brazilian midfielder hian Carrick-a hnuaiah goal thum a khung tawh. United ṭantute pawh 'kum khat dang' tiin an au rual hial!

Dik lo a awm

Man United hi an khelh ṭhat ṭumah pawh tlarhnung a phui tawk lo a, Villa lakah goal an khung hnuah tlarhnung a nghing nasa lehzual. United keeper Senne Lammens-a'n hna ṭha tak a thawk a, chutihrualin minute 64-naa Ross Barkley khung erawh dan rual a ni lo.

Barkley hian thla 14 hnuah Premier League-ah inkhel bul a ṭan a, box chhung aṭangin ṭha zetin a pet goal. Villa-in goal an khung hma pawh hian Amadou Onana hmangin an khung teuh viau a, first half-ah Leny Yoro tackle ṭhat zarah United an him hram bawk.

Man United hian Carrick-a hnuaiah result ṭha nei mah se clean sheet erawh match kua aṭangin vawi thum chiah an la nei a, hmasawnna awm bawk mah se insiamṭhat erawh a ṭul ang.

United an class

Villa-in tun hnaiah result ṭha an nei lo a, an khel a nung tawk lo. Man United pawhin an match hnuhnung berah Newcastle United hneh lo mah se theihna nei sang player an kawl tih a chiang. Minute 71-naah Bruno Fernandes-a ball fing chu Matheus Cunha-a'n um lutin, mawi zetin a pet lut a, Mbeumo awmna a dik avangin Brazilian forward hian hun thawl a neih phahah a ngaih theih bawk.

Bench aṭangin Sesko a rawn lut a, Cunha thawhrah sengin substitute Sesko hian minute 81-naah a khung. Kum 22 mi Sesko-a'n theihna sang tak a nei a, mah se a la puitling tawk lo tih erawh a lang. Sesko hi goal hmaah hriam hret se, United-in goal dang an khung belh leh ang.

Sesko hian Carrick-a hnuaiah match riat khel tawhin goal nga a khung a, a goal khung ṭum li hi bench aṭanga a luhin a ni. Tun dinhmunah Slovenian striker hi bul ṭantu a nih aiin bench aṭanga a luhin a thawh hlawk zawk.

United manager tur Carrick?

Manchester United thuneitute tan manager nghet zawn buai a ngai tawh lo a, an result thlirin Michael Carrick hi manager nghet atana dah a phu. Club legend Wayne Rooney pawhin Carrick hi manager nghet atan a duh thu a sawi a, amaherawhchu club thuneitute an la ngawi rih.

Inkhelh banah Carrick chuan, "Chak nuam kan ti a, ngaiah kan neih chhoh a ngai. Chak tura pawimawhte kan hre chho zel a, pathumna ni turin kan dinhmun a ṭha a, khelh tur erawh a la tam thung," tiin Champions League khel tura an dinhmun a ṭhat thu a sawi. Man United-in season thara Europe inelna sang ber an khel phak a nih chuan Carrick tan manager nghet nihna kawng a inhawng zau sawt ang. Chutihrualin United khelh hmabakah an elpui Chelsea leh Liverpool te an la awm tih hriat a ṭha.