Zemabawkin an zia chhuah, BCA an tlo

Mizoram Super League season 11 khelh mekah Zemabawk Basketball Club-in harhna an chang zel a, March 13, Zirtawpni zan khan 91-61 in Chanmari BC an hneh a, Hawla Indoor Stadium-ah Chapchar Kut an lawm. Hemi zan vek hian Khatla TBL-in Tuikual South 102-68 in an hneh ve bawk.

March 14, Inrinni zan khan Saron BC chuan 86-73 in Chhinga Veng BC an hneh a Zarkawt BCA chuan 89-72 in Mission Veng Hotshots an hneh bawk.

Insawpna chu

Chanmari BC hma hian tun season-ah Zemabawk BC-in bul an ṭan ṭha lo a, match li khel tawhin vawi khat chiah an chak. Mahse Zemabawk BC tan Pratyanshu Tomar-a'n phurna thar a pe a, Chanmari lakah a langsar hle.

Inkhel ṭan aṭangin Zemabawk BC an nung nghal a, fans ten an ṭawiawm ṭhat bawk avangin an phur a, Zemabawk BC fans ten Chanmari player thlengin an au el a, hnehna an chan theih nan player te tluk zetin an pawimawh.

Zemabawk BC tan K. Lalthianghlima'n point 22 neiin a score hnem ber a, Thianga hian rebound vawi 11 la bawkin player of the match-ah thlan a ni.

Thianga bakah hian Carl James Snyder (21), Pratyanshu Tomar (20), Lallianmawia (17) leh Lalropuia (10) ten Zemabawk chak nan an thawh hlawk hle.

Chanmari tan point 10 score tling thei an awm lo a; JP Walker, Lalrozama leh Lalnunsanga te khel ṭha viau mah se Chanmari BC an chakpui zo lo.

BCA nge nge

Inrinni zan khan champion lai BCA chuan Hotshots an hneh a, tun season-a che ṭha tak Hotshots tan BCA an la u hret a, Zarkawt club hi table chung berah an awm.

BCA tan H. Lalhmachhuana (21) chu player of the match-ah thlan a ni a, Hmachhuana bakah hian Arvinder Singh , Zonunsanga leh Lalnunpuia Renthlei (14) ten BCA chak an an thawh hlawk hle.

Hotshots tan an ram pawn player Darnell Johnson (28) a khel ṭha lehpek a, Johnson bakah Japjit Singh Gill (18) leh lalruatkima (13) te khel ṭha mah se an vanduai zan an tawng a, BCA lakah hnehna an chang zo lo.