Leverkusen-in Bayern chelh

Bundesliga-ah hmahruaitu Bayern Munich-in Inrinni zan khan Bayer Leverkusen an tlawh a, 1-1 in an inhnehtawk. Vincent Kompnay hoten point hnih an hloh a, an elpui Borussia Dortmund-in Augsburg 2-0 in an hneh thung.

BayArena-ah Leverkusen-in bul an ṭan ṭha a, minute rukna lekah Aleix Garcia-a'n a khung. Garcia ball pet hi Bayern defender Jonathan Tah-a'n a dan per avangin keeper Sven Ulreich-a tan dan a harsa.

Bayern-in minute 26-naah Tah hmangin siphurh sut angah an inngai mah se VAR hmanga ennawn hnuah handball vangin pawm a ni lo. Mikhual team tana harsatna belhchhah turin minute 43-naah Nicolas Jackson hnawhchhuah a ni. Harry Kane aia lut Jackson hian ṭul lo takin mual laiah Martin Terrier a tlawh thlu.

Second half-ah substitute Kane hmangin Bayern-in siphurh sutah an inngai a, mah se England captain hi a handball vangin pawm a ni lo. Minute 69-naah Luis Diaz hmangin Bayern-in siphurh an sut ta tho a, player 10-a khel chungin an chungnung zawk.

Inkhel a nung chhunawm a, minute 84-naah Diaz box chhungah a tlu. Bayern-in penalty beisei mah se referee-in tlu derah ngaiin yellow card vawi hnihna a pe a, a hnawt chhuak. Leverkusen-in player pakuaa khel Bayern na takin an an nawr a, injury time-ah ṭum hnih goal khungah inngai hman mah se offside vangin pawm a ni lo ve ve a, 1-1 in inkhel a tawp.

Bayern hian match 26 aṭangin point 67 an hmu a, Dortmund hian point 58 hmuin point kuain an pha lo. Bundesliga-ah hian team 18 chauh an awm avangin match 34 chauh khelh a ngai a, match riat chauh khelh tur a awm avangin Bavarians dinhmun erawh a la ṭha hle.