Atalanta-in Inter an chelh

Inrinni zan Serie A khelhah hmahruaitu Inter Milan-in hnehna an chang zo lo a, an mikhual Atalanta nen 1-1 in an inhnehtawk. Inter tan Pio Esposito-a goal khung chu hun tawp hma deuhin Nikola Krstovic-a'n a sut.

San Siro-a inkhelah mikhual tean an hlauhawm hmasa zawk a, minute 12-naah Gianluca Scamacca-a'n box pawn aṭangin kawh takin a pet a, Inter keeper Yann Sommer-a'n a dansak hlauh.

Mualneituin an chance neih hmasak ber an chhawr ṭangkai nghal a, minute 26-naah Esposito-a'n ṭha takin an hmahruaina goal a khung a, Atalanta keeper Marco Carnesecchi-a'n a dang zo lo. Italian rawlthar duhawm hian tun season La Liga-ah goal nga a khungna chiah a ni a, a hmabak a êng hle.

Second half-ah Inter an hlauhawm chhunzawm a, goal an khung belh thei lo thung. Marcus Thuram-a'n vawi hnih ngawt chance duhawm a hlah a, Denzel Dumfries-a'n a hun ṭha neih a chhawr ṭangkai thei lo bawk.

Minute 82-naah Dumfries a chesual zui a, Dutch defender hian ball hum a tumna lamah a tlu a, Krstovic-a'n goal ruakah an siphurh sutna goal a khung.

Team pahnihten goal khung tumin innawr chhunzawm mah se, goal hmaah an hriam tawk lo a, hun a tawp zui avangin point an insem.

Inter tan Lautaro Martinez chu squad-ah awm mah se luhtir a ni lo a, Argentine forward tel loin Inter an hriam tawk lo. Inter hian point 68 hmuin table-ah pakhatna an la ni tho a, an hmelma AC Milan aiin point riatin an sang zawk. Nizana Milan leh Lazio te inkhel result a zirin an inthlauhna hi a danglam thei thung.

Hetihlai hian Napoli leh Juventus ten an khingpuite an hneh ve ve a, Napoli-in an mikhual Lecce chu 2-1 in an hneh a, Rasmus Hojlund leh Matteo Politano ten goal khat ve ve an khung. Juve-in Jeremie Boga goal hmangin an an mikhualna amah Udinese an hneh ve bawk.