Real-in Barca hnaih leh sawt

Spanish club lian Real Madrid chuan Inrinni zan khan 4-1 in Elche an hneh a, an hmelma Barcelona an hnaih sawt. Real tan Antonio Rudiger, Federico Valverde, Dean Huijsen leh Arda Guler ten goal khat ṭheuh an khung a, Real midfielder Manuel Angel-a'n an lamah tilut mah se Real tan buaina tham a ni lo.

Santiago Bernabeu-a inkhelah mikhual tean Elche an zam lo a, mualneitu aiin ball an chang tam zawk a, Los Blancos-in chance hlauhawm an siam thei lo a, an buai hman ṭep. Goal chhuah hmasa ngat se inkhel result a danglam thei ang.

Mahse Real an vanduai reng lo a, minute 39-naah Valverde freekick pet chu Elche keeper Matias Dituro-a'n ṭha takin a dang mah se, a per chu Rudiger-a'n chiang takin a pet lut a, Real-in hma an hruai.

Real an phur laklawh a, minute nga hnu lawkah goal an khung lehnghal. Valverde-a'n box pawnah mawi taka amah vengtu a bum hnuin goal kilah tak a pet goal-in an hmahruaina a belhchhah a, goal mawi bik a ni. Uruguayan player Valverde hi tun hnaiah a team tan a ṭangkai takzet.

Second half-ah Real an hlauhawm hmasa a, Brahim Diaz-a'n keeper chauh a hmachhawn hnuah goal zawnah a pet thei lo. Minute 66-naah Daniel Yanez-a cross chu Huijsen-a'n a tauh lut a, Real-in goal thumin hma an hruai a, Elche defender ten Huijsen an veng ṭha tawk lo.

Minute 85-naah Eduardo Camavinga pass sual aṭanga ball kal zel chu Grady Diangana-a'n a pet a, Manuel Angel-a'n lo dang pialin an lamah a lut a, keeper Thibaut Courtois tan dan ngaihna a awm tawh lo. Elche goal khung erawh an mualpho hliahtu chauh a ni.

Minute 89-naah Los Blancos-in goal an khung leh a, Turkish midfielder Guler-a'n center pelh hma hret a ball a chan laiin, Elche keeper Dituro-a tlawh hma a hmu a, goal-ah pet nghalin Dituro a pet khum a, goal ropui a khung. Goal dang lut zui loin hun a tawp a, harsatna tawk loin Real an chak.

Hnehna an chan avangin Real hian point 66 an hmu a, hmahruaitu Barca nen point khatin an inthlau. Barca hi nizan khan Sevilla nen nizan khan an inhmachhawn a, an result a zirin an inthlauhna hi a danglam leh ang.

La Liga-ah match 10 chauh khelh tur a awm tawh a, Alvaro Arbeloa naute hian champion an tum a nih chuan an chetsual a thiang tawh lo a, Barca chetsual hun an chan a ngai tawh bawk ang.