Khatla TBL leh Chanmari intawng dawn

Mizoram Super League-a club lian pahnih Khatla TBL leh Chanmari BC te chu zanin dar 5:30-ah an inhmachhawn dawn. Team pahnihte hian champion leh semifinal an beisei avangin inkhel a hmuhnawm ang.

Zanin dar 8:30-ah Tuikual South leh tun hnaia hmuhnawm tak, Zemabawk BC te an inkhel dawn bawk a, basketball inkhel ngaina tan Hawla Indoor Stadium pan a fuh ang.

A hmuhnawm dawn

Match hmasa berah Saron BC hneh lo mah se TBL an insiamṭha tawh a, an ṭhat dan berin an inlan thei tawh a, an match hnuhnung paliah hnehna an chang vek.

TBL coach Laldinsanga (Mapuia) chuan, "Kan ṭhat dan berin kan khel thei tawh a, kan phur chhoh lai tak a nih bawk avangin Chanmari lakah hnehna chan kan inbeisei," tiin Vanglaini a hrilh.

Hetihlai hian Chanmari enkawltu hi TBL coach leh captain hlui Vanlalnunsanga (Lana) a ni a, a tawnhriat hmangin TBL hneh ngei an tum dawn a, an match hnuhnung bera Zemabawk BC an ngam loh avangin semifinal khel lo thei dinhmunah an ding.

Chanmari hian TBL hneh an tum a nih chuan, an ram pawn player te bakah an Mizo player MSL-a tawhnriat nei tawh ho khelh ṭhat a pawimawh dawn.

Phengphehlep vs Zemaballers

Zemabawk BC-in an match hmasa pathumah hnehna chang zo lo mah se, Saron hnehin an insiamṭha chho a, fans ten an ṭawiawm ṭhat bawk avangin team hlauhawm an ni leh tawh.

Liansangpuia naute hian semifinal luh beiseina an la nei a, mahse an hmabak match hnihah hnehna an chan ve ve a ngai dawn a, Tuikual South lakah hnehna chan ngei an tum dawn.

Hetihlai hian Tuikual South BC tan semifinal luh a beiseiawm tawh loh a, tun season-ah beisei an pha lo hle. Tuikual South hi tun season-ah an la tlawm vek a, relegation playoff khelh hmain an ṭhat dan bera khelh chhuah hman an tum dawn a, Zemabawk BC lakah hnehna chan ngei a tum ang.