Buaina kara playoff khel tur Iraq

US leh Israel ten Iran an run avangin buaina tam mah se, Iraq national football team chuan World Cup qualifier khelh loh phah an tum lo a, private thlawhtheihnain an inkhelhna tur hmun an pan ang.

Iraq hian Asia aṭangin World Cup khelh phak an la beisei a, April 1 khian inter continental playoff-ah Bolivia emaw Suriname emaw chu Monterrey, Mexico-ah an hmachhawn dawn.

Mahse, February 28 aṭang khan middle east-a thlawhtheihna kawngte chu an khar a, hei vang hian Iraq hi an zin theih loh mai an hlauthawng hman. Mahse, tun hnai khan Iraq FA chief Adnan Dirjal chuan FIFA hnenah an buaina chu an thlen thu sawiin, FIFA hian a buaipui.

Dirjal chuan, "FIFA president Gianni Infantino chuan FIFA secretary general Mattias Grafstrom hnenah thu pein, kan inkhelh theih dan tur buaipui turin a ti a, kan national team-te chuan private plane-in Mexico hi kan pan thei dawn a ni," a ti.

Iraq hian 1986 khan World Cup khel tawhin, group stage-ah an tla a, hemi hnuah hian World Cup khel turin an la tling leh lo - US, Mexico leh Canada inthlen ṭawm turah World Cup khelh phak ngei an tum.