AIFF-in Kushal Das a ui

All India Football Federation (AIFF) chuan thuchhuah siamin, Zirtawpnia thi, AIFF General Secretary hlui Kushal Das a liam ta chu pawi an tiin, an ui takzet tih an sawi.

Kushal Das hi kum 66 mi niin a thi a, a nupui leh a fapate pahnih a kalsan. Kum 2010-2022 chhung kha AIFF General Secretary hna a thawk a, Indian football-ah thil thar tam tak a thlen.

AIFF president Kalyan Chaubey chuan, "Kushal Das hian AIFF General Secretary a nih chhungin AIFF inrelbawlnaah nasa takin hma a la a, Indian football hmasawn nan a thawhhlawk takzet a, a hnathawhte hriatreng a ni tawh ang.

"He hun harsa takah hian a chhungte leh amah hmangaihtu zawng zawngte Indian football chhungkua chuan kan hre reng a, thlamuang taka a chawlh ka beisei," a ti a, Kushal Das a thlah.

Indian football-a hming langsar tak Kushal Das hi Chartered Accountant a ni a, AIFF GS a nih hma hian PwC, GSK leh Shell-ah te a lo thawk tawh a, kum 1996 khan IMG-in India rama infiamna khawvel a luhchilh khan Chief Financial Officer a ni.

IMG a chhuahsan hnuah hian, khawvel cricket-a thuneitu sang ber International Cricket Council chu zawmin, Chief Financial Officer-in a thawk a, kum 2010 khan AIFF General Secretary thar niin, AIFF a zawm leh bawk.

AIFF GS a nih chhung hian Indian football-in thil thar tam tak a tawng a, chung zingah chuan FIFA Under-17 World Cup 2017 India-in a thlen te, AFC Women's Asian Cup 2022 a thlente leh kum 2017-a Indian Women's League khelh ṭante chu a tel.

Kushal Das hian AIFF tan rei tak a thawh hnuah, kum 2022 khan a hrisel lohna chu chhuanlamin, AIFF-a a hna hi a kalsan a ni.