Majcen-a'n Liansanga nu tan a hlan

Indian Football League-ah Inrinni zan khan Diamond Harbour-in Shillong Lajong 2-1 in an hneh a, Kolkata club tana goal hnih khungtu Luka Majcen-a'n a goal khung hi a khelhpui Lalliansanga Renthlei (Buanga) nu tan a hlan.

Lunglei tlangval Buanga nu Lawmsangzuali Sailo chu March 14, Zirtawpni khan nat lawkna awm loin a thi a, Diamond Harbour midfielder pawh hian Lajong hmachhawn thei loin Mizoram a pan nghal. Slovenian striker Majcen hian a khelhpui Buanga harsatna a hriatthiampui tih lantirin, a goal khung zawhah Liansanga jersey chu a pho chhuak.

Liansanga hi AIFF Elite Academy chhuak a ni a, India club ṭha Churchill Brothers, Rajasthan United, Odisha leh Sudeva Delhi tan a khel tawh a ni.