AFC lawmna Rempuia ke vei lam leh C. Hriata 'finishing'
Indian Football League-ah Aizawl FC-in Zirtawpni zan khan Real Kashmir an mikhual a, Mizo club hi minute 90-naah 2-1 in an la hnufual zawk. Coach R. Lalruatfela hote hi chak lo thei dinhmuna an din hnuah mual vei lam aṭangin H. Lalrempuia'n a ke vei lamin mawi zetin ball a thlawh lut a, substitute Lalhriatpuia'n sang taka zuangin a tauh lut. Goal ṭha bik hmang hian Aizawl FC-in point khat an hlawh chhuak a, Real Kashmir nen 2-2 in an inhnehtawk.
RG Stadium-a inkhelah Real Kashmir-in Shedrack Charles a hmangin hma an hruai a, mualneitu lamin Zomuansanga penalty hmangin siphurh an sut. Second half-ah mikhual team-in Ateeb Ahmed Dar hmangin hma an hruai nawn a, chak turah inngai mah se Farkawn tlangval C. Hriata hmangin point khat hlu tak an hlawh chhuak.
Beisei pha lo
IFL round 2 zawhah Aizawl FC-in hma an hruai a, pathumna Chanmari FC nen point li ve ve an hmu. Chanmarians hian pakhatna nih theihna hun ṭha bawhpelhin Dempo SC laka inkhel an thunun hnuah 2-2 in an inhnehtawk. Aizawl FC lam tan Chanmari 'result' hi inzirna tur ni mah se an insiamrem hman lo.
Real Kashmir lamin huai takin bul an ṭan a, Aizawl FC tlarhnung thlenga ball an chuh avangin Mizo club-in ṭum dang an pha lo. AFC defender-te passing a ṭha tawk lo a, ṭum dang angin an midfielder-ten ball an keng thei lo bawk. Tlai lamah ruah a sur nasat avangin ground a nal a, mikhual team aiin mualneitu lamin an tuar zawk.
Minute 12-naah Ateeb Ahmed Dar-a ball pet satliah anga ngaih chu keeper Hriata'n man tum mah se a duh aia ball a tleng chak avangin a ti per a, goal ruakah Shedrack Charles-a'n a khung. Inkhel a nung ṭha a, chance ṭha bik erawh hmuh tur a tam lo.
A goal belh zel
Champhai Zotlang tlangval Laltlanzova'n penalty a hlawh chhuak a, Khawbel tlangval Zomuana rawn pen chhuakin minute 41-naah 'cool' takin Real Kashmir keeper Furkan Ahmad Dar a bum a, halftime-ah 1-1 a ni.
Aizawl FC-in second half-ah an khelh dan thlakin ball in pass aiin ball vawrh an thlang a, Real Kashmir an len ṭhat avangin R-a game plan a hlawhchham. Mizo club aiin mikhual team an khel ṭha zawk a, keeper Hriatpuia'n ṭum dang a pha lo.
Kawnpui tlangval hian first half tawp dawnah ṭha zetin dang mah se second half-ah ball a man sual avangin goal hnihna a lut teuh hle. Minute 77-naah throw in aṭanga ball thehluh satliah chu AFC player-in hmun hlauhawm laiah a tauh chhuak a, Ateeb Ahmed Dar-a'n ṭha zetin a tauh lut.
A tawpah Hriata
Aizawl FC lamin chak tumin tlarhma lam player an luhtir chho a, Hriata leh Brazilian forward Higor te an luhtir a, Farkawn tlangvalin danglamna a rawn thlen. Mizo club hian point hmuh ngei tumin na takin an nawr a, injury time-ah goal an sual chhuak.
Mual vei aṭangin Kolasib tlangval Rempuia'n duhthusama ṭhain a ke vei lamin box chhungah a vawrhlut a, Real Kashmir defender pahnih inkarah tak kalin C. Hriata'n a rawn tauh fuh chat a, Real Kashmir keeper Furkan Ahmad tan dan ngaihna a awm lo.
RG Stadium-a entu mipui ṭhahnem tak thawm a ṭha a, Aizawl FC-in an duhthusam point hmu thei lo mah se an point hlawhchhuah dan avangin mipui lawmna an siam ta tho. Mizo club hian March 20, Zirtawpni tlai dar 4:00-ah I League 2 champion Diamond Harbour an mikhual ang.