Kinsky loan-in chhuak dawn

Tottenham Hotspur chuan an goalkeeper Antonin Kisnky chu nipuiah loan-in an chhuah dawn a, Kinsky hian inrintawkna a neih theih nan a khelh phakna tur club a zawng dawn niin khawthlang chanchinbuten an sawi.

Czech goalkeeper Kinsky hian nikum January khan Spurs hi a zawm a, inelna hrang hrangah vawi 12 a inlan ve tawh. Kinsky hian hmabak êng tak neiin, beiseina sang tak nen Spurs a zawm a, beisei angin thil a kal lo thung.

March 10, Thawhlehni zan khan Champions League-ah Atletico Madrid nen an inhmachhawn a, manager Igor Tudor-a'n bul ṭan tirin first keeper Guglielmo Vicario aiah a luhtir.

Spurs tan Champions League-ah a vawi khat inlanna a ni a, mahse Kinsky tan zan chhinchhiah tlak a ni lo. Minute rukna lekah a tawlhthluk avangin goal an chhuah a, minute 15-naah a tihsual vangin goal an chhuah leh a, a chetsual vangin goal hnih an chhuah.Vicario-a'n a rawn thlak leh nghal.

Kum 22 mi Kinsky a inringtawk tawh lo tih a chiang a, Tudor-a'n minute 17-naah a la chhuak. Czech keeper hi coach berin lo hnem lo mah se, a ṭhianten an hnem a, Atletico fan-ten kut bengin an thlah bawk.

Tun season-ah Spurs an che chhe takzet a, season hmasaa Europa League champion hi Premier League aṭanga tla thei dinhmunah an ding. An talbuaina aṭanga chhanchhuak turin Igor Tudor la mah se danglamna a siam lo a, chhuak tura duhtu an awm leh der tawh.

Tottenham coach lailawk Igor Tudor-a'n thil thlak danglam a tum a, game boruak sangah player naupang a hmang a, a tisual chiang hle. Tudor hian league lamah tal a chet ṭhatpui loh chuan a dinhmun a derthawng dawn a, Spurs ṭantuten beisei ngam chiah tawh lo mah se result ṭha neih a tum dawn.