UCL-ah EPL club-te chance a chhia!

Champions League-ah Premier League club paruk an inlan a, last 16 an lut vek bawk - English club zingah Liverpool, Arsenal, Manchester City, Chelsea leh Newcastle United ten league kaltlangin UCL hi an khel a, Tottenham Hotspur chuan Europa League nomawi an chawi avangin an khel bawk.

Arsenal, Liverpool, Spurs, Chelsea leh City ten direct-in last 16 an lut a, Newcastle-in knockout playoff hmangin an khel ve leh bawk. Europe-ah English club-te an tal na, tia sawi hman a ni a, tunah chuan tla thei dinhmunah an ding vek!

Chelsea-in khualmualah 5-2 ngawta Paris Saint-Germain an ngam loh avangin 'comeback' na chance a chhe tawh a, Tottenham Hotspur-in khualmualah 5-2 a Atletico Madrid ngam loin, an tunlai boruak nen an 'comeback' a rinawm loh zawk.

City pawhin 3-0 ngawta Real Madrid an ngam loh avangin quarterfinal lut tur chuan thilmak an mamawh tel tawh - tuna beiseina la nei sang deuh chu Arsenal, Liverpool leh Magpies an ni.

Gunners hian khualmualah Bayer Leverkusen chu 1-1 in an inhnehtawkpui a, second leg-ah an comeback leh mai a beiseiawm. Liverpool-in 1-0 in Galatasaray an ngam lo a, an inkhelh lehna tur hi Anfield a nih avangin beiseina a la awm bawk.

Newcastle hi rin thiam a harsa - St James' Park-ah 1-1 in Barcelona an draw a, Catalan club hi a vannei zawk an ni. Mahse, second leg hi Nou Camp-a khelh tur a ni a, English club tan beisei tihsan viau a harsa mai thei.

English club-te hi last 16-a an tlak ṭhuau chuan, UEFA co-efficient ranking-a England rank a tlahniam leh ang a, hei hian season thara UCL khel tur a nghawng leh ang - chu chu UCL khelh phak tum mek Manchester United, Aston Villa, Chelsea leh Liverpool tan thawnthu lawmawm lo a ni thei bawk.

Opta-in a chhut dan aṭang chuan first leg khelh hma khan Arsenal-in quarterfinal lut turin 85.8% chance an nei a, tunah 77.9% ah tlahniamin, Liverpool pawh 82.3% chance neih kha 53.8% chiah chance an nei tawh.

Newcastle hian 44.7% chance an neih kha 32.2% ah a tla thla a, Manchester City phei chu Real Madrid laka 64.3% chance neia ngaih kha 9.4% ah an tla thla tawh! Chelsea pawh 53.3% chance nei aṭangin 7.3% ah an tla a, Spurs phei chu 46.3% aṭangin 3.3% ah an tla!

Chutihrual chuan data hmanga heng thil hi chhut mai a ni a, football-ah thil mak a thlen fo avangin rin bur chi a ni lo - English club tam zawk UCL quarterfinal-ah an la dam lo ang tih a sawi theih chuang loh.