F1 car khalh a nawm ka beisei - Verstappen
Max Verstappen chuan Formula 1 car thar chu hun lo kal zel turah khalh nuam zawk tura an duan a beisei thu a sawi a, kawng engkima hma an sawn theihna tura thlak danglam ngai a awm niin a ngai.
Dutch driver chuan, "Phunchiar pawh min ti mai thei, mahse car thar hi kei chuan khalh nuam ka ti thei lo a ni. F1 hi chhuahsan ka duh lo a, hma an sawn zel ka duh zawk. F1 hruaitute nen kan inbe tawh a, engkima hma kan sawn theih nan thil kan sawi ho," a ti a, F1 chhuahsan erawh a tum lo.
F1 hi FIA-in an lo tih ṭhin danin car regualtions an thlak thar a, tun thlasik khan thil lian tham tak an thlak nual a, 2026-a hman ṭan turin car bakah engine leh a ke thlengin an thlak vek. An regulations thar hi March 8, Pathianni khan Australian Grand Prix, Albert Park Circuit, Melbourne-a neihah an hmang ṭan.
F1 rules thar hi driver ṭhenkhatin an sawisel nasa a, sawiseltu zingah Dutch driver Max Verstappen chu a langsar pawl a ni. Verstappen hian practice aṭang tawhin engine tharin mamawh a ngah ta lutuk chu a lo sawisel tawh a, tun thlengin a ngaihdan a la sawh sawn lo. Dutch driver hi Australian GP neih zawh takah khan parukna a ni.
Lando Norris pawh sawiseltu zingah a tel a, Norris hian an thil thlak danglam avang hian chetsualna lian tak a thlen phah a rin thu a lo sawi tawh a, Pathiannia an intlansiak chu nuam lo a tih ber ṭum niin a sawi bawk.
Lando sawi ang ngeiin Pathianni khan Australian driver, Oscar Piastri chu formation lap-ah a chetsual avangin intlansiak pangngaiah a inlan thei lo.
Sawiselna karah rules thar ṭha titu an awm bawk a, Lewis Hamilton leh George Russel te an tel. Mercedes driver Russell hian Australian GP hma deuh khan Verstappen nen inel a chak thu a lo sawi tawh.
Russell chuan," Tunah chuan team zawng zawngin engine an nei ṭha tawh a, chuvangin Max (Verstappen) pawh a phur sawtin ka ring a, ani nen inel ka chak tawh hle," tiin F1 thil thlak danglam chuan a tiphur zawk thu a sawi a, Australian GP-ah a chak nghal.
Hetihlai hian F1 chuan car regulation a siam thar chu a thlak leh dawn niin khawthlang chanchibuten an tarlang a, thu chiang engmah a la awm lo thung.