Zemabawk an tho, BCA an chelh

Mizoram Super League season 11-ah a vawi khat nan Zemabawk BC-in hnehna an chang a, 86-77 in Saron BC an hneh. Champion lai Zarkawt BC erawh a vawi khat hneh loh an tawng a, 69-64 in Khatla TBL an ngam lo.

ZBBC tan Tomar

Match thum an khelh tawhah an tlawm vek avangin Zemabawk BC-in hnehna chan ngei an tum a, an tum ang ngeiin Saron BC an hneh. Zemabawk tan inter state player Pratyanshu Tomar a vawi khat nan a inlan a, Tomar hi Saron an hneh theih nan a ṭangkai hle.

Tomar hian point 32 neiin a score sang ber a, rebound vawi 16 a la bawk a, MSL-ah a tlangnel nghal hle. Tomar bakah Lalropuia a che ṭha a, Ropuia hian point 26 neiin player of the match-ah thlan a ni. Foreigner Carl Snyder-a'n point 15 nei bawkin Zemabawk BC an chakpui.

Zemabawk BC hian zaninah Chanmari BC an hmachhawn leh nghal dawn a, semifinal luh an duh a nih chuan Liansangpuia hote hi an chesual thiang tawh lo a, an chak vek a ngai tawh.

Hetihlai hian Saron BC an khel chhe bik lo a, Hugo S Chotter (25), Samson Stephen Sandhu leh Lalmalsawma (15) te an khel ṭha mah se Zemabawk BC an phur thar avangin an ngam lo a, a tlawm zawkah an ṭang.

TBL vs BCA

Inkhel hnuhnung zawkah ṭan hma aṭang tawhin mipui an khat tawh a, a chhan chu MSL-a club lian pahnih an intawn dawn vang a ni. Inkhel ṭan hma hauhin boruak a sang a, Hawla Indoor Stadium-ah ṭhutna awl a awm meuh lo.

Game an ṭan chiah a, inkhel hmuhnawm chhawpchhuah a nih avangin mipui thawm pawh a ring hle. First quarter-ah 21-18 in TBL in hma an hruai a, second quarter laklawh laiin ruah a sur a, court chhungah tui a far avangin inkhel tihtawp lailawk a ni.

Darkar khat dawn chawlh a nih hnuah inkhel an ṭan leh thei chauh a, inkhel a hmuhnawm loh phah loh a, club pahnih ṭantute an haw mai bik lo.

Inkhel borual sang takah TBL an dingchang zawk a, TBL tan Amjoy Singh Gill-a'n point 17 neiin a score hnem ber a, captain Vanlalṭhazuala'n point 14 neiin player of the match-ah thlan a ni.

Anni bakah hian Emmanuel VL Awmpuia leh an ram pawn player Makhel Ahkim Mitchell (10) ten TBL chak nan an thawh hlawk hle.

BCA tan foreigner Caio Domingos Oliveira-a'n point 19 bakah rebound vawi 10 a la a, Lalnunpuia Renthleiin point 15 nei bawkin point guard Zonunsanga'n point 11 thawk chhuak mah se TBL hneh nan a tawk lo a, point ngain an chak lo.

Zarkawt BCA hian hneh loh nei loa league round khar tum mah se TBL-in an phal lo a, BCA-in champion nawn an tum laiin TBL hian a vawi li nan champion an tum.