Mang ramah Bodo/Glimt an cheng

Bodo/Glimt chuan Champions League-ah thilmak an tih chhunzawm zel a, Thawhlehni zan khan 3-0 in an mikhual Sporting Lisbon an hneh a, second leg khelh tur awm mah se quarterfinal lut turin an dinhmun a ṭha tawh hle.

Club lian pathum a zawna an hneh avangin Bodo/Glimt-in mipui ngaihven an hlawh a, mahse an mikhual Sporting hi league phase-a pasarihna an nih bakah, champion lai Paris Saint Germain hneh theitu an nih avangin an chak ringtu an tam zawk.

Mahse Aspmyra Stadion-a inkhelah rinkai loh zawk Bodo/Glimt an huaisen a, chance nei hmasa zawkin Jens Petter Hauge, Hakon Evjen leh Patrick Berg ten goal an khung nghal teuh hle.

Minute 29-naah Sporting defender Georgios Vagiannidis a chesual a, hnung lam aṭangin Bodo midfielder Sondre Brunstad Fet a titlu a, minute thum dawn an enlet hnuah referee-in penalty a pe. Penalty hlawhchhuaktu Fet-a'n penalty pet goal-in a team hma a hruaipui.

First half hun pek belhah Ole Didrik Blomberg-a'n keeper chiah a hmachhawn hnuah tawih takin a pet goal a, an hmahruaina a belhchhah. Goal an khung theih nan Bodo player te ball inpe kual chu a mawi hle.

Second half-ah Sporting-in chance an nei hmasa zawk a, Iván Fresneda-a'n chance nei nghal mah se goal zawnah a pet thei lo. Portuguese club insiamṭha hret mah se inkhel an thunun thei lo a, an chance neih an chhawr ṭangkai thei lo bawk.

Mualneitu Bodo erawh an hlauhawm tluan zak a, minute 71-naah Hauge-a cross chu Kasper Hogh-a'n hnai tak aṭangin a tlawh lut a, Sporting keeper Rui Silva tan dan ngaihna a awm lo. Danish forward Hogh hian tun season UCL-ah goal nga a khung tling chiah a, World Cup-ah Denmark-in an koh ngei a rinawm.

Hun tawp hmain Sporting-in Luis Suarez hmangin chance an nei a, an chhawr ṭangkai thei lo thung. Bodo/Glimt lakah goal li khung tawh Suarez a nil a, goal an khung theih loh avangin harsa lutuk loin Bodo/Glimt an chak.

Norweigian club Bodo/Glimt hian a zawna Manchester City, Atletico Madrid leh Inter Milan an hneh avangin inrintawkna an nei tih a lang a, vannei turin an huaisen bawk. An thlen chin apiang hi thil thar zel a ni a, a sang thei ang ber thlen an tum dawn.