Arsenal chak zo lo

Liverpool, Tottenham Hotspur leh Chelsea te Champions League last 16-a an tlawm laiin Arsenal an tlawm ve lo a, mahse, Gunners hi an chak zo bik chuang lo–harsatna nei loa an hneh tura ngaih Bayer Leverkusen nen 1-1 in an inhnehtawk.

Gunners hi minute 46-naah an thiam thil hmangin hrem an ni–mualneitu Leverkusen-in corner hmangin goal hmahruai an khung. Alex Grimaldo-a corner aṭanga ball kal chu Robert Andrich chuan ṭha zetin a tauh lut a, 1-0 a ni.

Arsenal boss Mikel Arteta-a'n FA Cup-ah fixture hautak lo zawk a chan avangin Mansfield Town lakah player a thlak nual a, kha inkhela bul ṭan aṭang khan Leverkusen lakah player 10 a thlak danglam.

Inkhel ṭantir lamah Gunners hian goal hmahruai an khung ṭep a, mahse, Viktor Gyokeres-a siamsak chu Gabriel Martinelli chuan crossbar a tihper a, uiawm tak a ni.

Second half ṭantirhah Leverkusen lamin chance duhawm an nei bawk a, mahse, team movement mawi zet kan hmuh hnuah Martin Terrier-a hmawr bawk tumna chu Gunners keeper David Raya chuan a dang thei hram.

Mahse, heta Raya dan over aṭanga corner hi Leverkusen-in goal khung nan an hmang a, Gunners an hawihai. Laipui a puak lawk thei lo a, German club-in hnehna an chang mai dawn niin a lang tawh.

Mahse, Arteta substitution siamin awmzia a nei a, bench aṭanga luhtir pahnihin goal an rawn thawk chhuak–Leverkusen midfielder Malik Tillman chuan Noni Madueke titluin penalty a chawi a, minute 89-na a ni!

Penalty pet turin Kai Havertz a lo pen chhuak a, kum 10 zet a lo khelh tawhna club lakah Arsenal si phurh sutna goal a khung. Goal dang lut loin inkhel a tawp a, Arsenal tan Emirates Stadium-a 'comeback' dan tur ruahman nghal a ṭul ang.

Gunners boss Arteta chuan, "Kan inkhel boruak kha a inang lo ṭhin hle. Bul kan ṭan ṭha viau a, chance pawh kan nei. Martinelli-a'n crossbar a tihper a, kha kha lut ngat se, inkhel boruak a danglam daih ang.

"Mahse, a hmawr kan bawk ṭha tawk ṭhin lo a, counter-a min nawr letna tur chance kan siam a, an hlauhawm thei em em bawk," a ti a, a tira goal an khung lo chu pawi a tih thu a sawi.

Premier League champion tum Arsenal hian Inrinni zanah Premier League match khelin Everton an mikhual ang a, Thawhlehni zanah Leverkusen hi second leg khel turin an mikhual zui leh dawn bawk–an chawl hahdam hman meuh lo.