Mizo nulaten cricket inelnaah final lut

BCCI U-23 Women's One Day Trophy Plate Group-ah Mizoram hmeichhiaten final an lut a, vawiin chawhma dar 9:00 hian Chandigarh-ah Sikkim nen nomawi an inchuh ang. Final-a chak zawk hi season tharah elite group-ah an kaisang ang.

Mizoram hian final lut turin March 11, Ningani khan group match hnuhnung berah Meghalaya run 14-in an hneh. Ṭhumvawrah Meghalaya an vannei a, vawm hmasak an thlang. Mizoram tan Sai-hmingliani'n half century a siam a, Karie Chakma (41 runs), Malsawm-tluangi (32) leh captain Lalhmangaihsangi (25) te an thawh hlawk viau bawk.

Meghalaya bowler-te an chet ṭhat avangin Mizoram over 50 an dam tluan thei lo a, over 46.2-ah an thi fai vek a, run 177 an vaw chhuak. Hnehna chang turin Mizoram bowler-te an chet ṭhat a ṭul a, mamawh hunah tak Magareth Malsawmliani rawn che ṭhain wicket thum a la a, Thelma Laldinthari leh ZD Lalnunrili'n ten wicket hnih ve ve an lak bakah Jacinta Lalṭanpuii'n wicket khat a la. Meghalaya-in over 49/2-ah 163 siamin an thi fai vek a, Mizoram an chak hram.

Group match-ah Mizoram, Sikkim leh Meghalaya ten point 12 vek an hmu a, Net Run Rate (NRR) hmangin final khel tur an zawng. Mizoramin pakhatna dinhmun an hauh a, an hnuai chiaha awm Sikkim pahnihnaah an awm thung. Meghalaya erawh Mizoram laka an chak loh avangin pathumnaah an awm a, final khel turin an tling zo lo.