Mizo tan India hmeichhe team-ah hmun a awm - Tiami

AFC Women’s Asian Cup-ah India-in group match hnuhnung berah Chinese Taipei 3-1 in an hneh lo a, inelna aṭangin an tla. Thawhlehnia inkhelah Blue Tigresses tan Manisha Kalyan-i'n first half -ah khung mah se Chinese Taipei lakah point an hlawh chhuak zo lo.

India hmeichhe team hian knockout thleng pha lo mah se Asian Cup an khel hrim hrim hi hlawhtlinna a ni a, chutihrualin player zingah Mizo nula an tel lo thung. Chutihrualin India head team physio hi Lalthutiamngheti a ni a, Champhai nula hi SRI Ramachandra Institute of Higher Education and Research, Centre of Sports Science, Chennai-ah senior lecturer thawk lai a ni.

Tiami chuan, "India hmeichhe team hian hma an sawn a, Asian Cup khelh ringawt pawh hi a lawmawm. Chutihrualin khawvel hmeichhe team ṭha zawkte el pha tur chuan tun aia hmasawn a la ṭul. Asian Cup chin tawhah chuan Europe club liana khel player-te an awm nuk tawh a, India tan a la harsa a ni," tiin Vanglaini a hrilh.

Mizo hmeichhe hmalam hun chungchang sawi zuiin Tiami chuan, "Tun ṭumah hian Mizo tel lo mah ila, India aiawha tel turin Mizote tan chance a tamin ka hria. India aiawha khel kan nei tawh a, tunah nei rih lo mah ila IWL khel te kan neih nual avangin senior team-a khel hi kan nei leh thuai ang. Teirei peih a pawimawh a, Mizote hi thahrui leh theihna aṭanga thlir chuan India kawr ha turin kan ṭha tawk," tiin a sawi.