LESDE Inter Village atan entry fee pek ṭan theih

Aizawl District Football Association buatsaih LESDE Inter Village Football Tournament 2026 chu April 14, 2026-ah khelh ṭan a ni dawn. Aizawl District huamchhunga VC/LC tan tel theih a ni a, nimin aṭangin entry fee a pek ṭan theih.

Entry fee hi Rs 2000 a ni a, GPay-a pe duh tan 9862387738-ah a pek theih a, a pekna number-ah hian a screenshot thawn tel tur a ni. Pawisa faia pe duh tan Mizo Apparel (Vaivakawn) leh Younix (Zarkawt) ah te a pek theih bawk.

Team pakhat hian Aizawl District chhunga veng/khua tel lo aṭangin player pathum lak theih (re-inforce) a ni a, playing XI-ah pahnih chhawr theih a ni ang.

Player chu mahni vote thlakna khua/vengah ngeiah khelh tur a ni. Player lak (re-inforce) te chuan Voters ID an nei ngei ngei tur a ni a, Aizawl District chhunga mi ngei an nih a ngai bawk. Voters ID endikna atan hian kum 2025 VC/LC Electoral Roll hman a ni ang.

Kum la tling lote chu Digital Birth Certicate hmangin an kum endik a ni ang a, an awmna khua/veng tichiang turin Ration Card en a ni bawk ang. Heng Document pahnih aṭanga pawm theihte chauhin an khel thei ang.

Match Ball-ah ‘Nivia Dominator 3.0’ hman a ni dawn. Ticket Share system hman a ni dawn a, first round aṭangin, team-te leh organiser lamin ticket aṭanga sum hmuh an insem ang. Semi Final leh final-a entu aṭanga sum hmuh erawh lawmman atana ruahman a ni a, organiser lamin an chang ang.