Zanin aṭangin R. Dengṭhuama Indoor Stadium-ah MSL

Mizoram Super League season 11 chu zanin aṭangin R. Dengṭhuama Indoor Stadium-ah MSL khelh a ni tawh dawn a, dar 5:30-ah Zarkawt BCA leh Chhinga veng BC te match hmasa ber atan an inhmachhawn dawn a, dar 8:30 hian Mission Veng Hotshots leh Saron BC te an inkhel bawk ang.

BCA an kal fawr

Tun season MSL-ah BCA an hmuhnawm a, an thiampuipa Lalrina Renthlei tel lo mah se harsatna an tawk lo. BCA hian champion nawn turin kawng dik an zawh mek a, beiseina sang tak nen coach K. Vanlalruata hoin an khel a, zaninah pawh chak ngei an inbeisei leh ang.

Hetihlai hian Chhinga Veng BC ten a vawi khat nan MSL an khel a, match li khel tawhin vawi khat chiah an la chak a, an hneh chhun hi Tuikual South BC te an ni. Chhinga Veng BC hian Tuikual South BC an hneh ṭumin point 100 an score tling a, Mission Veng Hotshots an hneh loh ṭum hian point nga chauhin an inthlau a, an insiam rem chho ṭan.

Chhinga Veng BC hi BCA coach hlui Lalruatfela'n a enkawl a, Afela hian Zarkawt player te a hriatchian dawn bakah BCA hi nizana Khatla TBL nen inkhel zo hlim an ni a, a ni zawna an inkhelh dawn avangin an chau dawn a, Chhinga Vengin chak ngei turin theihtawp an chhuah ang.

Puak dawn nge par dawn

Mission Veng Hotshots hi tun season-ah beisei phak bakin an khel ṭha a, match li khel tawhah vawi khat chiah an la chak lo. Hotshots hian Chanmari BC chauh an la hneh lo a, an chak lohna zat pawh point khat chauh a ni.

Hotshots tan foreigner Darnell Johnson chu an innghahna a ni leh dawn a, Johnson hian match li khel tawhin point 30 a la score tling vek a, amah thlawp turin Lalruatkima a awm dawn bawk a, kai thar ni mah se semifinal an beisei ngam.

Hetihlai hian Saron BC an duai bik lo a, match thum khel tawhin vawi khat chiah an la chak lo. Saron BC Mizo player te MSL-ah an tlangnel a, MSL X-a rookie of the league Lalmalsawma bakah an ram pawn player te hoin Hotshots thawm ring lai tihreh an tum dawn.