Silly Point : Ahmeda Bad nge Good?
Hapta li chhung ram 20 inelna, inkhel 54 zet kan thlir hnuah tun Pathianin zan hian ICC T20 World Cup 2026 final chu a thlengtu ram India leh New Zealand ten Ahmedabad ah hmawr an bawk dawn ta. Champion lai India hian nomawi an humhim thei dawn nge? A ṭum khatna atan Kiwis ho hi T20 khawvel champion an ni dawn tih chu he Chawlhni zan darkar thum chhung inkhel hian a hril tawh dawn.
India
T20-a khawvel no 1 batsman nilai Abhishek Sharma form a ṭha tawk lo tih a chiang tawh a. Chumi khuhmawi tur chuan tun hma aṭanga selector-ten a talent ṭhat aia an rin ngam tawk loh an tih fo Kerala tlangval Sanju Samson chu India tan hmakhawsang Bible-a Samsona iangin India pachak nih a tlin.
Sanju Samson bak hi tun World Cup-ah hian batsman han khel ṭha uchuak tak an awm lem lo a. Hun tawp lama finisher role hnehsawh taka khel Thilak Verma hi a ni leh deuh mai awm e. Tun tournament-a an khelh dan ang bawkin contri den den policy bawk a pawimawh leh ang..
Bowling department lamah Varun Chakravarty-a magic khawvel batsman-ten an man ṭan a, Arshdeep Singh a tournament ropui ber a ni lo chiang bawk. Jasprit Bumrah leh Axar Patel a te kut leh ban rangkachak bawk a pawimawh dawn tih a chiang. Powerplay zawh over 7-15 inkara an vawm danin thui tak a hrilh dawn a ni.
Kiwis
New Zealand hi Tim Seifert, Finn Allen, Rachin Ravindra leh Glenn Phillips te chungah innghat nasa hle. Tun tournament chhung pawhin heng batsman palite run siam 80% hi an innghahna a ni. Champion tur chuan an pali zinga tu emaw ber hian century a vuak chhuah leh a ngai ngei ang.
Fast bowler Lockie Ferguson leh Matt Henry te hi tun World Cup bowler hlawhtling leh hlauhawm ber an ni ngei ang a, he mite pahnih hi India batting line up ṭhiat darh vek thei khawpa form ṭha hmang mek an ni.
Ahmedabad
Narendra Modi Stadium hi India cricket team tan khelmual uanpui ber a ni hauh lo a. ICC World Cup 2023 Final leh tun World Cup a group stage lama South Africa laka dawl zawra an lo zawr tawhna hmun a ni. He center pitch 11 lai nei khelmualah hian he thu buatsaih lai hian lei dum ( black soil) nge an hman dawn lei sen ( red soil) a siam tih hi kan hre hman lo.
Lei dum pitch an hman chuan run ṭhahnem tak inkhel kan hmu leh ngei turah ngai ila, lei sen pitch erawh a khelmual a lo zau deuh nen spinner-te an pawimawhna hmun a ni leh dawn chiang tih sawilawk turin zawlnei nih kher a ngai lo e.
I thlir ang
Ṭhumvawra vannei zawk hian vuak hmasak nge an thlan ang vawm hmasak tih hi thil hriathiam harsa ni a. T20-ah hi chuan vawm hmasak hi an lo thlan dan tlangpui a ni. Amaherawchu India hi semifinal-a England an hneh khan kum 2014 hnuah ICC T20 knockout tournament-a vaw hmasa zawk chunga chak leh thei awmchhun an ni tlat.
Thil pakhat erawh he thuziak khar nan ka thailang duh. Powerplay leh slog over-ah chuan team tin hi an inang tlang deuh vek tawh a. Middle over ( over 7-15 ) inkara dot ball nei tlem zawk zawk team hi a dingchang zawk an ni ang tih huai takin ka sawi ngam e.
Final inkhel en tui vek u.