T20 inkhelah 499 runs!

T20 World Cup semifinal-ah India leh England ten inkhel hmuhnawm bik an chhawp chhuak a, ram pahnih run siam zat belhkhawm hi 499 runs a ni pha a, ODI-ah pawh nih se run ṭhahnem pangngai tak a ni pha. Ningani zan inkhelah hian Men in Blue-in bat hmasain 253/7 runs an siam a, awlsam taka chak tura ngaih ni mah se Three Lions-in over tawp ber thlengin chak beiseina an la nei a, 246/7 runs-in an chhanglet. Suryakumar Yadav leh a hote run sarihin an chak hram.

Wankhede Stadium, Mumbai-ah England-in vawm hmasak an thlang a, Abhishek Sharma-a'n run kua lek a siam avangin India dinhmun a chhe hman. Mahse, Windies an hneh ṭuma hero Sanju Samson a rawn inlar. Samson hi run 15 lek a siam tihin England captain Harry Brook-a'n awlsam taka man theih a thlauh a, hei hi inkhel tidanglamtu a tih theih. Kerala tlangval hian 74 runs siam belhin 89 runs a siam.

Ishan Kishan pawhin ball 18 lekah 39 runs siamin Shivam Dube-a'n ball 25-ah 43 runs a rawn belh a, Hardik Pandya (27) leh Tilak Varma (21) te strike rate a ṭha bawk a, India-in 253 runs an siam. England bat hun a thleng a, opener Phil Salt (7) leh Jos Buttler (25) te an che ṭha tawk lo a, captain Harry Brook pawhin run sarih chauh a siam.

India awlsam takin an chak dawn emaw tih hnuah Jacob Bethel a rawn inlar a, ball 48 lekah 105 runs a siam. Axar Patel-a fielding ropui zet chu India chakna chhan pakhat a ni a, Brook (7) leh Will Jacks (35) ten run tam an siam loh phah. Jasprit Bumrah a rawn pawimawh leh a, over 18-naah run ruk chauh a pe. Over tawp berah England-in 30 runs an la mamawh a, ball hmasa berah Bethel a run out hnuah Jofra Archer-a'n six vawi thum hlap mah se inkhel result a ti danglam ta lo.