Pacman hmaa midang hmachhawn tur Mayweather

Boxing khawvela hming langsar ni reng tawh tur, Floyd Mayweather chuan Manny Pacquiao nen rematch an neih leh hmain sum tuakna 'fight' dang a nei leh phawt dawn a, June thla hian veteran Greek kickboxer Mike Zambidis chu exhibition bout-ah a hmachhawn dawn.

Kum 49 mi Mayweather leh kum 47 mi Pacquiao te hi September 19 khian Las Vegas-ah an inhnek dawn a, kum 2015-a 'Fight of the Century' tih hiala sawi fight-a lo inhmachhawn tawh boxer pahnih inhnek leh tur hian ngaihven a hlawh hle.

Hetiang boruak karah hian vawi 50 fight a hmachhawna tlawm nei miah lo Mayweather-a'n inbuatsaih nan exhibition bout neih a tum a, Athens khawpuiah kum 45 mi Zambidis nen hian an innuai dawn a ni.

Mayweather chuan, "Kum 2026 hi ka tan chuan kum duhawm tak a ni dawn tih a chiang a ni. Tunah chuan ennawm chhawp turin ka inbuatsaih leh ta a, Athens, Greece lo inring rawh le - fighter ropui pahnih in hmu dawn e," a ti a, kum 49 ni tawh mah se, a tha a la za hle.

American boxer-in a hmachhawn tur Zambidis hian kickboxing-ah vawi 181 fight hmachhawnin, vawi 157 a chak a, vawi 24 tlawm a nei thung. Heng zinga vawi 87-ah hian a khingpui a knockout a, Mayweather hmachhawn a châk tawh khawp ang.

Weight division pangaa champion thei Mayweather hian exhibition fight nei zeuh zeuh mah se, professional fight a neih hnuhnung ber erawh kum 2017 kha niin, mixed martial arts fighter Conor McGregor round 10-naah technical knockout hmangin a hneh a ni.