Zanin aṭangin MSL 11

Mizoram Basketball inelna sang ber Mizoram Super League, season 11-na chu zaninah khelh ṭan a ni dawn a, season hmasa finalist Khatla TBL leh Zarkawt BCA an inlan nghal dawn. Tlai dar 5:30-ah TBL leh Saron an inhmachhawn dawn a, zan dar 8:30-ah BCA-in Zemabawk BC an hmachhawn dawn bawk.

Tualchhung basketball ngainatute tan Hawla Indoor Stadium pan hun a ni. Mizoram chhunga basketball inelna sang ber hi Zonet Rihnim-ah live-a pek chhuah a ni dawn a, Zonet YouTube channel-ah a en theih bawk ang.

TBL vs Saron

Match hmasa zawkah MSL vawi thum lo champion tawh, TBL hian season hmasa lam aṭanga an player pawimawh Ṭhazuala, Emanuel leh Lalliansanga (Lsa)an la kawl a, inter state player Sahaij Pratap Singh Sekhon leh Palpreet Singh te an chah lut bawk. A vawi li nan champion an tum leh dawn.

TBL tan Saron zuam ngawt erawh a thiang lo. MSL X Rookie of the League Lalmalsawma (Mala) leh T. Lalhriatzela (Tea) an nei a, inter state player pahnih - Samson Stephen Sandhu leh Vishnu Prasad an kawl ve bawk avangin TBL hneh turin theihna sang tak an nei.

ZBBC vs BCA

Season hmasaah beisei phak baka che ṭha, Zemabawk BC an inlan dawn a, Zemabawk hian Ropuia leh Thianga te an lalut a, an player tharte hi MSL bakah Mizoram basketball-ah an mikhual lo hle. ZBBC hian foreigner Carl Snyder an lalut a, MSL 11-ah champion nomawi chawi tumin theihtawp an chhuah dawn.

Hetihlai hian champion lai Zarkawt BCA tan season hnuhnung pahniha MVP - Lalnunpuia Renthlei (R-a) leh Zonuna an nei a, Matthew Remtluanga Sailo a awm bawk avangin Mizo hlang pawhin an ṭha hle. Brazilian player Oliveira an lalut bawk a, an nomawi kawl lai humhim an tum dawn a, inkhel hmuhnawm a beisei ngam.