IFL-a pet goal hmasa ber K. Hriata

Aizawl FC midfielder K. Vanlalhriatzuala'n Zirtawpni khan Namdhari FC lakah minute 43-naah goal mawi a khung a, Khawlailung tlangval hi Indian Football League-a goal khung hmasa ber a ni. Coach R. Lalruatfela hote hian khualmualah chak phu khawpin an khel ṭha a, mah se injury time-ah Namdhari tan Abdoulaye Diallo-a'n a khung avangin 1-1 in an inhnehtawk.

NorthEast state aṭanga I League-a champion thei awmchhun Aizawl FC-in khualmualah IFL match hmasa ber an khel a, coach R-a'n Mizo hlangin bul ṭantu a thlang. Ludhiana-a inkhelah Mizo club-in inkhel an thunun zawk a, an khel ṭha zawk. Chutihrualin goalkeeper Vanlalhriatpuia'n hna a neih ṭumah a hna a tlin hle.

Goal chance nei ṭha zawk erawh Mizo club an ni a, midfielder ball thiam Lalawmpuia Sailo-in Vincent Lalduhawma cross chu goal-ah pet mah se keeper Nishan Singh-a'n a dang ṭha hle. Minute 43-naah K. Hriata'n box chhungah ball changin pet tura a insiam rem hnuah goal kilah kawh zetin a pet lut a, goal mawi bik ni ringawt loin IFL-a goal hmas ber a ni.

MPL12 top scorer Zomuansanga'n no. 22 ha tawh loin no. 18 a rawn ha a, a no. thar a vanneihpui lo. Winger ṭha Laltlanzova pawhin crossbar a pet per a, Aizawl FC-in goal hnihna an khung theih loh an tuar. Injury time minute ruk pek belh a ni a, minute ruknaah Seilenthang Lotjem ball pet chuan goal ban perin, hemi per hi goal ruakah Abdoulaye Diallo-a'n a khung.

Mizo club tan goal dang khung belhna hun a awm tawh lo a, 1-1 in inkhel a tawp. Aizawl FC hian March 6, Zirtawpni zan dar 6:30-ah Rajasthan FC an mikhual dawn a, mipui en châk tur erawh March 24, Zirtawpni zana Chanmari FC nena an inkhel tur a ni ang. Tualchhung football ngainatuten Indian Football League-a Mizo derby khelh hun an nghakhlel hle.