Man United mikhual tur Palace

Manchester United-in Michael Carrick-a hnuaiah hneh lo an la tawng lo a; March 1, Pathianni zan dar 7:30-ah Crystal Palace an mikhual dawn. Selhurst Park-ah nikum November thla khan United hian Palace hi 2-1 in an hneh.

FA Cup champion Palace hian nipui bazara Eberechi Eze an chan hnuah thlasik bazarah captain Marc Guéhi an chan leh a, FA Cup an champion ṭum aiin an ṭha tawh lo zawkah a ngaih theih. Chutihrualin thlaksik bazarah Tottenham aṭangin Brennan Johnson leh Wolves striker Jorgen Strand Larsen te an lalut a, tun hnaiah hma an sawn leh hret.

Palace hian league match hnuhnung berah Wolves 1-0 in an hneh a, Europa League Conference-ah pawh last 16 lut turin playoff-ah Bosnia and Herzegovina club HŠK Zrinjski Mostar an hneh bawk. Manager Oliver Glasner hian season tawpah Palace a chhuahsan dawn a, Man Untied nen pawh sawi zawm a ni hman. Tunah erawh Glasner hi United enkawl tura rin zingah a tel tawh lo a, United thuneitute rilru a thlak theih dan ṭha ber chu Michael Carrick-a kaihhruai team hneh a ni thei ang.

Man United lamin match nga chak zawn thei lo mah se Carrick hi record thar siam thei dinhunah a ding. Palace hi an hneh a nih chuan English manager hi United enkawltu zinga Old Trafford-a match hmasa panga chak thei hmasa ber a ni ang. Carrick-a hote hian match hnuhnung berah Everton 1-0 in an hneh a, Benjamin Sesko-a'n goal awmchhun a khung.

Sesko hian Carrick-a hnuaia bul a la ṭan lo chungin bench aṭanga lutin goal thum a khung tawh a, tun season Premier League-ah goal sarih a khung tawh. Palace lakah Sesko hi bul ṭan thei dinhmunah a ding tawh a, bul a ṭan dawn a nih chuan Amad Diallo aia a luh a rinawm.