MSL khelh nan ni thum chauh awm tawh

Mizorama Basketball inelna sang ber Mizoram Super League season 11-na chu nizan khan Dawrpui Multipurpose Hall-ah Tip Off neih a ni a, home minister K. Sapdanga'n MSL11 hi a hawng.

Tualchhung basketball inelna ngaihhlut hi March 3, Thawhlehni aṭangin khelh ṭan a ni dawn a, Hawla Indoor Stadium leh R. Dengṭhuama Indoor Stadium khelh a ni dawn. March 11, Nilaini thleng Hawla Indoor Stadium-ah khelh a ni ang a, a hnu lamah R. Dengṭhuama Indoor Stadium-ah khelh chhunzawm a ni ang.

Inelna hi team pariat Khatla TBL, Saron BC, Zemabawk BC, Zarkawt BCA, Tuikual South BC, Mission Veng Hotshots, Chanmari BC leh Chhinga Veng BC ten an hmachhawn dawn.

Club pariatte hian league round-ah match sarih ṭheuh khelin vawi khat ṭheuh an intum kual dawn a, league round hi March 18, Nilaini thleng khelh a ni dawn. League round khelh zawhah a sang paliten semifinal an khel ang a, a sang paliin zinga tel pha loten relegation game an khel dawn bawk. Semifinal leh relegation game hi March 24 , Thawhlehni aṭangin an khel ṭan dawn thung.