PSG an tlang thei hram

Season hmasa treble champion Paris Saint-Germain-in Champions League last 16 lut turin vanneihna an mamawh a, an ram club ve tho AS Monaco nen 2-2 a an inhnehtawk hnuah, inkhel hmasa result hmangin an tlang hram!

PSG hian knockout playoff-a an intawn hmasakah Monaco hi 3-2 in an hneh a, Parc des Princes-ah chak zo lo mah se, inkhel hmasa result hian puiin, inkhel pahnih belhkhawmah 5-4 in an chak a, PSG an tlang.

AS Monaco-in si khat an phur sa tih hriain, PSG khelmualah chak tumin an khel a, chance pawh an nei hma. Mahse, Mamadou Coulibaly chuan Maghnes Akliouche-a siamsak chu uiawm takin a thlawh over a, PSG an thaw huai.

Mahse, Monaco-in khualmualah hnehna chan ngei an tum - minute 45-naah an beisei ang ngeiin goal an thawk chhuak a, Coulibaly chuan Akliouche tan siamsak ve zuiin, kum 24 mi attacking midfielder hian goal-ah a chantir.

Goal dang lut loin chawlhlawk hman zui a ni a, inkhel hmasa nen 3-3 a nih mek avangin PSG an hlauthawng tih hai rual a ni lo. Mahse, Paris club vanneihna a her chhuak - minute 58-naah Monaco player Coulibaly chu a yellow card pahnihna avangin hnawhchhuah a ni a, player pakhatin PSG an tam zawk.

Minute hnih hnu lawkah Marquinhos chuan si phurh sutna goal a khung zui a, PSG-in tam zawk nih an chhawr hma hle! Hetah hian an duhtawk mai lo, Achraf Hakimi-a shot chu Monaco goalkeeper Philipp Kohn chuan lo dang mah se, a per lehlam chu Khvicha Kvaratskhelia ke bulah tak a tla a, Georgian winger hian goal-ah a chantir chiang hle.

Thawklehkhatah PSG 'mood' a inthlak a, an hlauhthawnna a kiang. Monaco tan Jordan Teze chuan hun pek belhah khung ve leh mah se, a team tan danglamna a thlen hman tawh lo a, 2-2 a inkhel tawpin, PSG an tlang.

PSG boss Luis Enrique tan erawh inenfiahna tur a awm - Champions League last 16 an lut hram a, Ligue 1 lamah pawh an hmahruaina a fal rih lo hle. Anmahni hnaih bertu Lens aia an sanna chu point hnih chauh a ni mek a, match 23 an khel tawh.