Mizoram dinhmun a hriat dawn

Khelo India Tribal Games 2026 group match hnuhnung ber chu vawiin hian RG Stadium-ah khelh a ni dawn a, group winner chauhin final round an lut dawn. Chawhma dar 9:00-ah

Meghalaya leh Manipur an inkhel ang a, tlai dar 2:00-ah Mizoram leh Tripura te an inkhel zui ang.

Mizoram leh Meghalaya te hi an point a inang a, an goal difference bakah an goal khung zat leh chhuah zat thlengin a inang vek. Group match tawp bera khingpui sawp zawk zawkin final round an lut dawn. Chhiarkawp dan chuan chak la nei lo Manipur leh Tripura tan final round luh theih dan a la awm ve bawk.

Mizoram hian Thawhṭanni khan Meghalaya lakah point khat hlu tak an sual chhuak. RG Stadium-a inkhelah Meghalaya-in minute 87-naah hmahruaina goal an khung a, chak turah an inngai. Hun pek belhah pawh minute sarihnaah HK Lalhruaitluanga'n kawh zetina volley goal a, 1-1 in inkhel a tawp. Mizoramin beiseina an neih phah a, match tawp bera an khelh dawn avangin final round lut turin an dinhmun a ṭha zawk.