Ngaihven hlawh Real leh Benfica

Champions Legaue knockout playoff-ah Real Madrid chuan zanin dar 1:30-ah Benfica an mikhual dawn a, team pahnihten last 16 luh an la inbeisei ve ve bakah, first leg-a Vinicius Jr leh Gianluca Prestianni te boruak avangin mipui ngaihven a hlawh dawn.

Benfica enkawltu Jose Mourinho a lo ni bawk nen second leg-ah pawh boruak ṭang tak hnuaiah an inkhelh a rinawm. Portuguese manager Mourinho erawh first leg-a red card a hmuh avangin technical area-ah a ṭhu thei lo ang.

Boruak inṭanna

Team pahnihte hian league round aṭang tawhin boruak an nei lian tawh a, Benfica-in injury time-a goalkeeper Anatoliy Trubin goal khung zarah goal difference hmangin an lut hram. Real erawh an chak loh avangin playoff an khelh a ngaih phah.

First leg-a inkhel turin Benfica leh Real an inpawt fuh leh chat a, Portuguese manager Jose Mourinho chuan,"Hliam an tuar a, lal hliam chu an hlauhawm," tiin first leg-ah an khelh dawnah a lo sawi tawh. Real an tlawm nawn duh lo a, Vini Jr goal hmangin Estádio da Luz-ah hnehna an chang.

An inkhel hmasa zawka sawi hlawh ber erawh Vini leh Prestianni te an ni a, Vini-a'n ngeiawm taka a goal khung a lawm chu Prestianni-a'n a ngaithei lo a, Argentine winger hian a jersey-a a ka hup chungin Vini a ṭawng khum. Hei hian boruak rawn ti ṭha loin Vini Jr thinrimin khelh zui a tum lo a, bench-ah a ṭhu. Arberloa leh coaching staff dangin an thlem hnuah Vini Jr a rawn kir a, goal luh hnu hian minute 10 lai an chawlh phah.

Prestianni-a'n a ka hup avangin a thusawi tak hriat a ni lo a, Kylian Mbappe chuan,"A hming lam rik tlakah pawh ka ngai lo. No. 25 khan Vini kha zawng tiin a ko a, vawi nga a koh ri ka hria. Benfica player-te pawhin an hria ang," tiin a khelhpui Vini a chhan a, Champions League khel tlak a nih loh thu a sawi.

Benfica winger Prestianni chuan, "Vini Jr kha chi leh chi inthliarna ang zawngin ka ṭawng khum lo a, ka ṭawng a hre sual zawk a ni. Tumah hi ka hmusit ngai lo a, Real Madrid player-te pawh an hriat sual vangin ka chanchin dik lo taka an sawi hi pawi ka ti," tiin a sawi thung.

Prestianni hi insawi thiam tum mah se UEFA chuan match khat a hrem a, Real lakah a inlan thei dawn lo. UEFA chuan Vini Jr laka a chet dan chu chhui chian a nih tur thu an tarlang bawk. Prestianni bakah an manager Jose Mourinho chu first leg-ah red card a hmuh avangin Real an hmachhawn hunah a team a ho thei dawn lo bawk. Mourinho hi dressing room-ah a lut thei dawn lo a, technical area-ah a ṭhut theih dawn loh bawk avangin Benfica tan channa nasa tak a tling.

Tute nge khel dawn

Los Blancos tan Jude Bellingham, Eder Militao, Dani Ceballos, Dean Huijsen leh Rodrygo te chu hliam vanga khel lo tur chiang sa an ni . Real hi an ṭhat dan berin inlan thei dawn lo mah se tlarhma lamah tun season UCL-a goal khung hnem ber Mbappe (13) a awm a, eng club tan pawh hmachhawn châkawm loh a ni.

Mbappe leh Vini Jr an inkawp leh a rinawm a, Vini hi tun hnai match ruk a khelha goal a khung vek a, Benfica ṭantute lak aṭangin auh elna tawk dawn mah se Santiago Bernabeu-a khel tur an nih dawn avangin a zam dawn lo a, amah au nawmnah tute ka hup nan goal khung leh ngei a tum dawn.

Forward pahnih thlawp turin Federico Valverde leh Arda Guler te an awm a, Trent Alexander-Arnold a awm dawn bawk a, inhliam hnua lo kir Arnold a khel ṭha ṭhin hle. Alvaro Arbeloa naute hi an match hnuhnung berah Osasuna lakah an tlawm a, an hmelma Barcelona-in lehpelin pahnihna an ni a, Benfica lakah an thinrim hrikthlak an tum ang.

Real hi Spanish Super Cup final-ah Barca hneh loin an tla tawh a, Copa del Rey-ah an mangṭha tawh bawk avangin Champions League leh La Liga-ah chiah nomawi an beisei tawh a, holam taka chak loh an tum tawh dawn lo.

Benfica tan tlarhma lamah Argentine winger Prestianni inlan dawn lo mah se Vangelis Pavlidis a awm dawn a, Grecce international hian tun season inelna hrang hrangah goal 28 a khung tawh a, Real laka thilmak thlentir turin theihna sang tak a nei. Tlarhnung lamah Manchester City defender hlui Nicolas Otamendi a awm dawn bawk a, defender tawnhriat ngah Otamendi hi Benfica ban rinawm a nih bakah first leg-a boruak tisangtu pakhat a ni.