Mizoramin Manipur an hneh

Khelo India Tribal Games 2026-ah Mizoramin Inrinni khan RG Stadium, Mualpuiah Manipur an hmachhawn a, 3-0 in hnehna an chang. Group E inkhel hnunung zawkah Meghalaya-in Tripura 3-0 thoin an hneh ve bawk.

Mizoram hi coach C. Lalduhawma leh manager Lalnunsanga (Anuna) te kaihhruaina hnuaiah an khel a, Republic Veng tlangval Lalmuanawma'n (Munez) captain hna a chelh. Manipur lakah hian first half-ah Munez-a'n goal hmahruai khungin second half-ah Lalmuansanga leh Lalramdinsanga ten an khung belh.

Mizoram manager Anuna chuan, "Bul kan ṭan ṭha a, Meghalaya kan hneh chuan final round kan lut dawn. Inkhel pawimawh bik a ni a, kan phur tawh khawp mai," tiin Vanglaini a hrilh. Mizoram leh Meghalaya te hi vawiin chawhnu dar 2:00-ah an inkhel ang a, heta chak zawk hian final round an lut ang. Chawhma dar 9:30-ah Manipur leh Tripura te an inkhel bawk dawn.