Mizo pali telna Mumbai City chak nghal

Tun season Indian Super League-a an match hmasa berah Mumbai City an chak nghal a, Lallianzuala Chhangte captain-na hnuaia khel team hian Chennaiyin FC chu 1-0 in an hneh.

Mumbai Football Arena-a inkhelah team pahnihin goal khung an harsat a, Chennaiyin lamin long ball hmanga Mumbai tlarhnung ṭhiah tum ṭhin mah se, an tihleithei bik lo bawk.

Goal lut loin chawlhlawk an hmang a, second half ṭan aṭanga minute linaah goal kan hmu ta nge nge. Finland international hlui Joni Kauko chuan Pereyra Díaz tan ball cross a tum a, mahse, hei hian Chennaiyin defender Pritam Kotal perin, goal-ah a lut daih!

Hun tawp thlenga goal dang lut tawh loin, he goal hi Mumbai chak nan a tawk - Mumbai City tan captain Lallianzuala Chhangte bakah Hmingthanmawia Ralte (Valpuia) leh player thar Lalnuntluanga Bawitlung ten inkhel bul an ṭan a, an khel ṭha hle.

Sreenidi Deccan aṭanga Mumbai City pantu Tluanga tan ISL-a a match hmasa ber a ni a, bul a ṭan nghal. Hetihlai hian Mumbai-in nipui transfer-a an lakluh tho Zothanpuia chu bench aṭanga luhtir a ni a, Aizawl FC aṭanga Mumbai pantu midfielder tan ISL-a a match hmasa ber a khelhna a ni ve bawk.

Tun season-ah a vawi khat nana ISL club zawm Mizo player 10 ngawt an awm a, Tluanga leh Zothanpuia hma hian SC Delhi forward Augustine Lalrochana, Mohammedan midfielder Lalthankima leh Lalngaihsaka, NorthEast United tana khel Lalrinzuala leh Lalbiakdika ten a vawi khat nan ISL match an lo khel tawh bawk.

Ningani zan inkhelah hian Chennaiyin tan Laldinliana Renthlei leh Lalrinliana Hnamte (Terina) ten inkhel bul an ṭan a, PC Laldinpuia erawh hliam nei chunga squad zawm a nih avangin bench-ah bak a la awm rih lo.

Tun kartawpah ISL khelh chhunzawm a ni dawn a, zaninah match hnih awmin, East Bengal-in tlai dar 5:00-ah Sporting Delhi an mikhual ang a, Jamshedpur leh Punjab FC te chu zanin dar 7:30-ah an inlan bawk ang.

Pathianni zanah pawh match hnih vek a awm dawn a, tlai dar 5:00-ah Bengaluru leh NorthEast United an innuai ang a, Kerala Blasters khelmualah Mumbai City chu zan dar 7:30-ah an leng zui dawn bawk a ni.

ISL-ah hian club 14 zinga 12-ten, nizana Mohammedan leh FC Goa inkhel chhiar tel lohin, match khat ṭheuh an khel tawh a, kar hmasa lama Odisha leh Punjab FC inkhel tur sawn tlai a nih avangin club pahnih hi an la inlan ve lo thung.