City hmaa ding tur Newcastle

Manchester City-in zanin dar 1:30 hian Etihad Stadium-ah Newcastle United an mikhual dawn. Pep Guardiola hote hian hnehna an chang thei a nih chuan hmahruaitu Arsenal nena an inkarah point hnih chauh a awm tawh ang.

City leh Magpies hi League Cup semifinal-ah an inhmachhawn a, Pep-a hote hi aggregate-ah 5-1 in an chak. Amaherawhchu nikum November thla khan Premier League-ah Eddie Howe-a hote 2-1 in an chak thung.

Zanina an khelh tur hi Premier League a ni a, an inkhelh tawhna thlir chuan City tan point hloh theihna tih a chiang. Mahse, tun hnaiah City an inharhtharna an chang a, Anfield-ah point thum an hlawhchhuah hnuah an khingpui an la hneh vek.

Kar liam ta khan FA Cup-ah Salford City 2-0 in a hneh a, hliam tenau vangin Erling Haaland a inlan lo. Zaninah erawh Haaland hi inlan tura ngaih a ni a, January transfer-a an lakluh Marc Guehi leh Antoine Semenyo te pawhin bul an ṭan ang.

Magpies pawhin a zawnin vawi thum hnehna an chang a, Tottenham laka 2-1 a an chak hnuah FA Cup fourth round-ah Aston Villa 3-1 in an hneh. Kar laihawl khan Champions League knockout playoff-ah Qarabag 6-1 in an sawp a, Anthony Gordon-a'n hattrick a siam. Howe-a hote phur lar tak a ni a, City tan tum an châkawm loh.