Arsenal tan champion kawng zawh zan

Premier League-ah Arsenal-in zanin dar 1:30 hian Wolverhampton Wanderers an hmachhawn dawn a, champion tum Mikel Arteta hote tan pakhatna dinhmun sawhnghehna hun remchang a ni ang. Gunners hian match 26 aṭangin point 57 an hmu a, anmahni hnaih bertu Manchester City aiin point liin an hmu tam zawk.

London club hian league match hnuhnung berah Brentford nen 1-1 in an inhnehtawk a, amaherawhchu kartawp khan FA Cup-ah Wigan Athletic 4-0 a an sawp avangin Wolves hmachhawn turin an inpeih ang. Rob Edwards-a kaihhruai Wolves hian tun season-ah point kua chauh an la hlawh chhuak. Season tawpa relegate ngei tura ngaih team lakah champion tum tan chak ngei a ṭul dawn.

Arsenal leh hliam

Gunners an dam kim dawn chauh a, hliam bawkin a rawn tlak buak. Wolves an hmachhawn hunah Mikel Merino, Kai Havertz, Max Dowman, Martin Odegaard, Ben White leh Riccardo Calafiori te an inlan a beiseiawm loh.

Spanish manager Mikel Arteta pawhin, "A hmain striker hliam vangin kan buai a, defender hliam vangin kan buai leh a, tunah midfielder hliam vangin kan buai. Player inhliam tel lo pawhin ṭha takin kan khel a, chutihrualin an rawn kir vat a pawimawh. Thlan tur ngah a pawimawh a, chutihrualin khingpuite mila player thlan tur neih a pawimawh," tiin Wigan Athletic an khelh zawhah a sawi.

No. 10 Saka

Arsenal midfielder-te an inhliam nasa a, Wigan nen an inkhelh ṭumin Bukayo Saka-a'n no.10 hna a chelh. Saka hian a hna a tlin bakah Odegaard, Havertz leh Merino te an inlan theih hmel loh avangin Wolves lakah pawh no.10 a thawh nawn a rinawm.

Saka hian Eberechi Eze leh Gabriel Jesus bakah mual sira awm Noni Madueke nen an inthlawp ṭha a, English winger hi a chet ran bawk avangin khingpuite tan ven a harsa. Wolves erawhin Saka khelh dan an zirchiang hman tawh dawn a, Gunners forward tan hna a harsa sawt ang.

Chutihrualin Wigan lakah Eze-a'n a theihna sang tak a rawn pholang a, penetration pass a pe ṭha ṭhin hle. Wolves nena an inkhel tur erawh league match a ni tawh dawn a, an khingpuite hi point khata an lungawi dawn avangin tlarhnung an inhnawh dawn a, penetration pass pek a harsa dawn.

Engtin zel?

Wolves hian league match hnuhnung berah Nottingham Forest an chelh a, khualmualah goal khung lo mah se goal an venghim. FA Cup-ah pawh Grimsby Town 1-0 in an hneh a, match zawnin an clean sheet.

Coach Rob Edwards-a'n Arsenal chelh dan an zawng dawn a, Arteta hoten goal an khung hma lo a nih chuan Molineux Stadium-ah harsatna an tawk thei dawn.

Wolves hian tun season-ah vawi khat chauh chak an la nei a, point thum an hlawhchhuahna hi an mualah a ni. Molineux Stadium-ah hian January thla khan Newcastle United an chelh tawh bawk a, Arsenal tan fimkhur a ṭul ang.