Zaninah MFA Futsal League semifinal

Mizoram chhunga futsal inelna sang ber MFA Futsal League semifinal chu zanin hian R. Dengṭhuama Stadium, Mualpuiah khelh a ni dawn a, BR Studio YouTube channel-ah a en theih ang. Zanin dar 6:00 hian champion lai Tlangnuam leh C. Lalmuana Memorial FC te an inkhel ang a, dar 8:00-ah FC Thyristor leh Tuikual North GO FC te an inkhel dawn.

MFA Futsal League-ah hian team 11 an awm a, February 16, Thawhṭanni zan khan league round khelh zawh a ni. Round tawp ber khelh hma hian Tei Memorial Saron Veng an relegate tawh a, an hnung zui tur a la chiang lo. Round 11 match hmasa berah Zonuam FC-in C. Lamuana Memorial FC 3-1 in an hneh lo a, Tei Memorial hnung zuiin an relegate.

Futsal League-ah hian goal difference aiin head to head a pawimawh zawk a, Zonuam hian Senator point hmuh zat chiah hmuin goal difference-ah ṭha zawk mah se an intum ṭuma 4-3 a an hneh loh avangin an relegate. Table thlirin Tlangnuam leh Thyristor pawh an point hmuh zat a inang a, an intum tawhnaah 2-2 in an inhnehtawk a, goal difference-a ṭha zawk Tlangnuamin pakhatna dinhmun an luah.

Pathumna leh palina te pawh an point hmuh zat a inang chaih. Tuikual club GO FC-in 3-1 a C. Lalmuana Memorial an hneh avangin pathumnaah an awm ta zawk. Futsal League league round-ah pakhatna Tlangnuam leh palina C. Lalmuana Memorial te hi point khat chiahin an inthlau a, semifinal-a inkhel turte an inkhel tawk khawp ang.