World Cup-ah Australia dinhmun a chhia

T20 Cricket World Cup-ah inelna thlengtu Sri Lanka-in Thawhṭanni zan khan Australia wicket riatin an hneh. ICC hnuai inelnaa sulhnu nei ṭha Aussies hi group stage aṭanga tla nghal thei dinhmunah an ding. He thu i chhiar meuh chuan an tla thei tawh bawk.

Pallekele International Cricket Stadium, Balagolla-a inkhelah Sri Lanka-in vawm hmasak an thlang. Australia tan captain Mitchell Marsh (54) leh Travis Head (56) ten bul an ṭan ṭha a, over 8.2-ah thi loin 104 runs an siam. An bul ṭan dan thlir chuan 220 runs siam chho thei tur an ni.

Mahse, Sri Lanka ho tan spinner an rawn inlar a, an fielding a ṭha bawk nen middle leh lower order ho an che thei lo. Aussies-in 77 runs chauh siam belhin wicket 10 an hloh a, 181 runs an siam.

Sri Lanka bat hun a thleng a, opener Pathum Nissanka-a'n ball 52 lekah 100 runs a vaw chhuak. Tun World Cup-a century hmasa ber avangin Lions-in over 18-ah 184/2 runs siamin wicket riatin hnehna an chang.

Australia hian February 20, Zirtawpniah Oman an hmachhawn dawn a, an inkhelh meuh chuan an hmalam hun a hriat tawh dawn. Nimin khan Zimbabwe leh Ireland an inkhel a, Zimbabwe hi an chak a nih chuan Aussies beiseina a tawp ang.

Ireland hi chak pawh ni se, February 19-ah Zimbabwe-in Sri Lanka an hneh thei a nih chuan Aussies tan beisei tur a awm dawn chuang lo. Australia tan Sri Lanka hneh loh a pawi a, chu aia pawi zawk chu team nem zawka ngaih Zimbabwe an hneh loh avangin tun dinhmun hi an thleng.