Arsenal laipui a puak ngun

FA Cup fourth round-ah Arsenal-in goal li an khung a, Emirates Stadium-ah Wigan Athletic 4-0 in an sawp. Pathianni zan inkhelah Gunners tan Noni Madueke, Gabriel Martinelli leh Gabriel Jesus ten goal khat ṭheuh an khung a, Wigan player Jack Hunt-a'n an lamah a tilut bawk.

Mikel Arteta-a'n Brentford nena inhnehtawk team aṭangin player pariat a thlak a, William Saliba pawh bul ṭantu zingah a rawn tel a, Gabriel-a'n hahdamna hun a nei thung. FA Cup-ah David Raya aiah Kepa Arrizabalaga a rawn inlan a; Saliba leh Cristhian Mosquera te inkawpin mual sirah Ben White leh Myles Lewis-Skelly te an awm.

Midfield-ah Christian Norgaard khelhna hun pek a ni a, Eberechi Eze nen inkawpin tlarhmaah Noni Madueke, Bukayo Saka, Gabriel Jesus leh Gabriel Martinelli te an awm. Saka-a'n dam lam a pan chho a, English forward dam ṭhat hi Gunners tan a pawimawh takzet.

London club-in League One club lakah bul an ṭan ṭha a, minute 11-na lekah Eze-a ball fing um luttu Madueke-a'n cool zetin a khung. Crystal Palace aṭanga Arsenal zawmtu Eze-a'n minute 19-naah penetration pass ṭha zet a pe leh a, no. 9 hna chelhtu Gabriel Martinelli-a'n um lutin goal hnihna a khung.

Arsenal goal bawh a na a, Madueke leh Saka ten Wigan tlarhnung ṭhiatin Saka cross chu Wigan defender Hunt-a'n minute 23-naah an lamah a tauh lut. Gunners an che ṭha chhunzawm a, minute 27-naah Gabriel Jesus-a'n Wigan offside trap a bum hnuah cool zetin goalkeeper Sam Tickle a pet khum.

Darkar chanve pawh tling loah 4-0 a ni tawh a, goal dang tam zawk beisei a ni. Mahse, Arsenal-in goal dang an khung belh thei tawh lo a, bench aṭanga rawn lut Viktor Gyokeres bakah Martinelli ten second half-ah chance ṭha bik an hlah.

Arsenal-in nomawi pali beiseina an chhi nung a, an match hmabak a pawimawh chho vek. February 18, Nilaini zanah Wolves an tlawh dawn a, Molineux Stadium-ah hnehna an chang thei a nih chuan Manchester City aiin Premier League-ah point sarihin an sang thei dawn.

Wigan lakah chak chiang mah se Arsenal lawm a kim lo. Warm up neih laiin Riccardo Calafiori a inhliam a, minute 10-na lekah Ben White an thlak. Lactics lakah Brentford an khelh ṭuma inhliam captain Martin Odegaard an chhawr thei lo bawk.

Spanish manager Arteta chuan, "A hmain striker hliam vangin kan buai a, defender hliam vangin kan buai leh a, tunah midfielder hliam vangin kan buai. Player inhliam tel lo pawhin ṭha takin kan khel a, chutihrualin an rawn kir vat a pawimawh. Thlan tur ngah a pawimawh a, chutihrualin khingpuite mila player thlan tur neih a pawimawh," tiin a sawi.