Champion zia chhuahtu Inter

Serie A hmahruaitu Inter Milan chuan 3-2 in an mikhual Juventus an hneh a, Inter hian match khata khel tam zawk chungin an hmelma AC Milan aiin point riatin an sang zawk. Inter tan Pio Esposito leh Piotr Zileniski ten goal an khung bakah Juventus defender Andrea Cambiaso-a'n an lamah a tilut a, Juve tan Cambiaso leh Manuel Locatelli-a'n khung ve leh mah se a tlawm zawkah an ṭang.

San Siro-ah a tir aṭangin inkhel a nung nghal a, minute 17-naah Inter full back Luis Henrique ball cross chu Juve defender Cambiaso-a'n dang pialin an lamah a tilut palh a, keeper Michele Di Gregorio tan dan ngaihna a awm lo.

Goal an chhuah hnuah Juve an zam bik lo a, minute 26-naah Weston McKennie-a ball cross satliah chu Inter defender te kara a tlang hnuah Cambiaso-a'n a tihsual siamṭhat nan hnai tak aṭangin a pet goal a, an si phurh a sut. Inter goal khung nana pawimawh Luis Henrique-a'n Cambiaso a veng ṭha tawk lo.

An insiamṭha chho dawn chiah tihin Juve tan thil lawmawm lo a thleng a, minute 42-naah Pierre Kalulu-a'n ṭul lo taka Alsessandro Bastoni a pawh thluk avangin yellow card pahnihna a hmu a, hnawhchhuah a ni.

Red Card an hmuh avangin second half-ah Juventus an bet a, minute 76-naah Inter tan Pio Esposito-a'n hmahruaina goal a tauh lut a, awlsam takin Inter an chak dawnin a lang hman a, mahse minute 83-naah Localtelli-a'n a pet goal a, Inter player te inthlahdah vangah a ngaih theih.

Team pahnihten point an insem dawna a lan hnuah Zielinski a inlar a, Polish midfielder hian mawi taka ball a lak hnuah box pawn aṭangin a pet goal a, hun tawp zui nghalin Inter-in hnehna an chang.

Tun season-ah Cristian Chivu naute an che ṭha tluang a, Serie A hmahruaitu an nih bakah Champions League leh Coppa Italia-ah an la dam a, treble champion an nih theih avangin an tha an thlah duh lo ang.

Hetihlai hian Milan club pakhat zawk Milan chuan 2-1 in Pisa an hneh a, Milan tan Reuben Loftus-Cheek leh Luka Modric ten goal an khung a, table-ah pahnihnaah awm chhunzawm zelin Inter chetsual hun an chang ve reng.