Zaninah East Bengal inkhel dawn

Kolkata club lian East Bengal chuan zanin dar 7:30 hian an league match hmasa ber an khel dawn a, Lalrinzuala khelhna NorthEast United an mikhual ang.

East Bengal-in Mizo player langsar an kawl nual a, defender ṭha Lalchungnunga, midfielder Edmund Lalrindika, striker David Lalhlansanga leh midfielder Vanlalpeka Guite te chu an neih sa an ni.

Tun hnaiah Kolkata club hian Odisha-a a contract hmang zo Jerry Mawihmingthanga an la lut bawk a, nikum khan Real Kashmir aṭangin midfielder Lalramsanga an la lut bawk.

East Bengal squad-ah a tirin Ramsanga a lang lo a, hei vang hian Vanglaini, February 14, Inrinni chhuakah Ramsanga hi East Bengal player zingah tarlan a ni lo a, ISL-a Mizoram player tel zat pawh 40 tiin tarlan a ni.

Ramsanga bakah hian Goa pawhin an squad-ah Malsawmtluanga an belh bawk a, player pahnih an awm belh tak avangin ISL-a Mizoram player zat hi 42 tihna a ni - heti zata tam Mizoram player-in ISL an la khel ngai lo.

Zanina East Bengal hmachhawn tur NorthEast United-ah hian midfielder Fredy Chawngthansanga, forward pahnih Lalrinzuala Hauhnar leh Lalbiakdika te an awm a, I League-a hming chher tak Rinzuala hi ISL-a a che tla hmuh a châkawm ta hle.

Tun season ISL hi FanCode-ah online-a en theih a ni a, ṭan dawn tak tak takah FanCode hian Sony Sports Network chu TV lama ISL pe chhuak turin inremna an neihpui ve leh chhawng. TV-a ISL en duh tan chuan Sony Sports Ten 2-ah a en zel theih dawn a ni.