Barca ngam loh Atletico leh Lookman

Atletico Madrid chuan Ningani zan khan 4-0 in Copa del Rey semifinal-ah Barcelona an sawp a, second leg khelh tur la awm mah se Copa del Rey final lut turin an dinhmun a ṭha hle. Atletico tan tan player thar Ademola Lookman a che ṭha zel a, goal a khung bakah Julian Alvarez goal khung tur a siamsak a, Antoine Griezmann-a'n goal khung bawkin Barca defender Eric Garcia-a'n an lamah a tilut bawk.

Inkhel hmuhnawm chu

Riyadh Air Metropolitano-a inkhelah a tir aṭangin Atletico Madrid an hlauhawm nghal a, minute thumna lekah Diego Simeone fapa Giuliano Simeone-a'n goal a khung nghal teuh hle a, Barca keeper Joan Garcia-a'n a dang hlauh a, Barca an him hram.

Barca an thlamuang rei lo a, minute ruknaah defender Eric Garcia pass satliah chu keeper Joan Garcia-a'n a rah ṭhelh a, Pau Cubarsi-a'n pet chhuak mah se ball-in goal line a pelh hman avangin Eric Garcia-a'n a lamah a tilut! Ball-in goal line pel lo pawh ni se Lookman-a'n chiang taka a pet goal chhunzawm avangin Barca-in si an phur dawn tho.

Minute riat hnu lawkah French forward Griezmann-a'n tawih takin Atletico goal hnihna a khung leh nghal a, Barca an insiamrem hman lo. Barca player ten Griezmann an veng ṭha tawk lo bawk a, goal khung turin hmun awl a nei zau.

Goal hnih an chhuah hnuah Barca an insiamṭha hret a, chance nei pawh an nei nghal a, Fermín López-a'n corner aṭanga ball lo kal chu goal bar pet per a nan a hmang a, Atletico thin a phu zawk ang. Catalan club-in ball chang hnem zawk mah se an vanduai zan an tawng a, goal an khung thei lo. Mualneitu Atletico erawh ball chang tlem zawk mah se an vuak let a na a, an chance neih chhun an chhuah hlauhawm thei hle.

Diego Simeone naute an phur laklawh a, minute 33-naah counter attack hmangin an nawr a, Julian Alvarez-a'n Lookman tan ball pein Lookman-a'n cool takin a pet goal. Nigerian forward Lookman a hlauhawm chhunzawm a, first half hun pek belhah amah siamsaktu Alvarez tan a siamsak ve a, Argentine forward Alvarez-a'n chiang takin a pet goal a, Atletico-in first half-ah goal li an khung der.

Second half-ah Barca-in ball an chang hnem zawk a, Cubarsi-a'n goal a khung nghal a, mahse a offside avangin an sut leh a ni. Hansi Flick-a nauten goal khung tumin nawr mah se Atletico tlarhnung an ding khawng tlat a, keeper Juan Musso a khel ṭha bawk.

Barca vanduai a kaltluang a, minute 85-naah own goal khungtu Eric Garcia-a'n Atletico midfielder Álex Baena a pet tluk avangin hnawhchhuah a ni a, Spanish defender tan zan chhinchhiah tlak a ni lo. Hun tawp zui nghalin Atletico-in nuamsa takin hnehna an chang.

En hlawh Lookman

January transfer-ah Atletico Madrid-in Ademola Lookman an lak khan a flop ringtu a tam zawk an ni, Atletico-in tlarhmaah Alexander Sorloth leh Julian Alvarez an neih sa bawk avangin hmun a chan tam a beiseiawm hran loh bawk.

Mahse Lookman-a'n Atletico tana a match hmasa berah Real Betis an hmachhawnin goal a khung nghal a, player hmuhnawm ber pawl a ni. Barcelona lakah goal khung leh nghalin amah ringhleltute ka a hup chiang hle.

Second leg khelh tur la awm mah se Atletico dinhmun a ṭha tawh a, an ke vei lamin final an rap tawhah a ngaih theih. Atletico hian Pathianni zan dar 8:45-ah Rayo Vallecano an lenchilh dawn a, Diego Simeone naute hian Copa del Rey-a an khelh dan hi La Liga-ah pawh chhawm an duh ang.

Hetihlai hian an chak loh avangin Barcelona hnual hman an ni lo a, Thawhṭanni zan 1:30-ah Girona khelmualah an leng lut dawn. Barca hi an hmelma Real Madrid-in an um ve reng a, point khat chiaha inthlauin an chetsual hun an chang reng. Hansi Flick-a hote hian hmahruai chhunzawm zel an duh chuan a rang thei ang bera insiamṭhat an mamawh.