Forest-in Sean Dyche an ban

Nottingham Forest chuan Nilaini zan khan goal awm loin Wolverhampton Wanderers an inhnehtawkpui a, match hnuhnung panga an khelah vawi khat chiah an chak a, nimin zing khan an coach Sean Dyche an ban thu an puang.

Forest hi tun season-ah an khel ṭha lo hle a, Wolves an draw hnu hian 17-naah awmin relegation zone-a awm West Ham United aiin point thum chiahin an hmu tam a, an dinhmun a ṭha lo hle. Forest hian Sean Dyche an ban hma hian Nuno Espírito Santo leh Ange Postecoglou te an lo ruai tawh a, result ṭha an neih theih loh avangin an ban ve ve.

Sean Dyche hian nikum October khan Ange Postecoglou thlakin Forest a zawm a, English manager Dyche hnuaiah club lian an ngam nghal a, an insiamrem dawna a lan laiin an daih rei lo a, result ṭha an neih chhunzawm theih loh avangin ni 114 hnu lawkah Sean Dyche pawh an ban leh ta a ni. Forest-in thuchhuah siamin,"Sean leh a staff te chungah an hnathawh te avangin kan lawm a, an kal zelna turah duhsakna kan hlan e," tiin Sean Dyche an thlah.

Nottingham Forest hian Sean Dyche an ban rualin Wolves manager hlui Vitor Pereira hming a ri nghal a, nikum November-a Wolves-in an ban tak Pereira hi Forest enkawl tura hming langsar ber a ni. Forest hian enkawltu thar an nei leh a nih chuan tun season chhungin manager pali an nei hman dawn.

Tun karah Forest hian match khelh tur an nei tawh lo a, February 19 zanah Fenerbahce nen Europa League playoff-ah an inhmachhawn dawn a, an match dawt lehah Liverpool an mikhual lehnghal dawn bawk avangin Forest tan a awlsam dawn lo.