Vawiin thleng International Half Marathon atan inziah luh theih
Aizawl International Half Marathon (AIHM) 2026 chu Valentine's Day-ah (February 14) neih a ni leh dawn. Vawiin thleng Lammualah a la inziah luh theih a, infiamna leh hriselna lam ngaina tan 'international event' a tel theihna hun ṭha hi bawhpelh phal chi a ni lo. Europe leh Africa aṭangin infiammi an rawn tel dawn.
Sports minister Lalnghinglova Hmar chuan, "Fitness hi hriselna hi nun pui ila, intih hmuh theih a ni. Mi zawng zawng tel turin kan sawm. Nu leh paten kan fate pawh hetiang lam hi kan ngaihvenpui a ṭha. Mobile leh social media lam kan buaipui nasa a, kan taksain a tuar. Kan tu leh fate pawh 5km tlan thei hram tura enkawl hi nu leh pa mawhphurhna a ni," tiin Vanglaini a hrilh.
Lawmman a ṭha
AIHM 2026-ah hian lawmman a ṭha a, mipa leh hmeichhe category siam hran niin an dawn zat a inang vek. Half marathon (21.1 km)-ah hian mipa leh hmeichhia pakhatnain nuai hnih ve ve an dawng dawn.
Half marathon bik hi inziahluh hun a tawp tawh a, 21.1 km-ah hian a tlan zawng zawngin 'chip' an hmang vek dawn. Chip hmang hian an tlan ṭan leh an tlan tawp hun a hriat theih dawn a, GPS coordinate a nih avangin an tlanna kawng engkim a hriat vek dawn. Motorah an chuang ru em tih thlengin a hriat vek dawn a, hemi a nih avang hian inbuatsaihna nan hun a duh bik a, registration hun khar a ni.
Mahse, 21.1 km hi ropui ber mah se hetah hi chuan foreigner bakah state pawn lam infiammite an tlan dawn avangin lawmman beisei ngam a har dawn. Lawmman beisei duh tan registration la inhawnna 10km leh a hnuai lama tlan hi a finthlak ang.
10km-ah hian mipa leh hmeichhia category a awm a, pakhatnain Rs 75,000 ve ve an dawng dawn. Hemi hnuai leh chiah 5km-ah phei chuan mipa leh hmeichhe category bakah senior leh junior a la awm cheu. Senior category hi kum 60 chunglam a ni a, junior hi kum 10-15 inkar tan a ni. Junior pawh hi mipa leh hmeichhiaah ṭhen a ni leh bawk.
Mahni hriselna fiah duh leh nuam tia tlan duh tan 10km leh 5km hi a tawk viau a, ṭhian hoa inthurual theihna tur a nih bakah infiamna ṭha tehna a ni thei ang. Football, basketball, volleyball, boxing, judo, taekwondo leh infiamna dang hrang hranga infiammite zinga tute fitness nge ṭha ber tih hriat theihna a ni dawn.
Ruahmanna a ṭha
Nimin khan AIHM 2026 chungchangah Sports Minister hoin Aizawl DC, Home Deparment, Tourism Department, SYS, Sports Council, AMC, Health Department, Police, Traffic Police bakah a tlanna tur huamchhunga Local Council te nen joint meeting neih a ni.
Inelna nei turin ruahmanna peih fel a ni tawh a, foreigner-ten Protected Area Permit (PAP) chungchanga harsatna an tawh pawh sut kian sak theih tura beisei a ni bawk.
Vawiin hian Lammualah a la inziah luh theih bakah inziaklut tawhte pawhin bib lam tur a ni. Europe leh Africa aṭanga rawn tel tur an awm bakah state pawn aṭanga rawn tel tur an awm a, Assam aṭangin journalist rualin an rawn chhim dawn bawk.
Engtin zel?
AIHM 2026 tlan ṭanna tur hi RG Stadium, Mualpui a ni a, zing dar 5:30-ah tlan turte thlen tur niin warm up nan darkar chanve dah a ni. Zing dar 6:30 aṭangin tlan ṭan a ni dawn a, 21.1 km-a tlan turte an tlan hmasa ber dawn.
Hemi zawh hian category dangte a inchhawkin an tlan chho ang a, chawhma dar 10:00-ah lawmman semmna neih a ni ang. Mizoramin hlawhtlin takin half marathon hi nikum khan a buatsaih tawh a, kumin lamah hmasawnna a awm theih nan mipui an pawimawh ang.