A licence nei thar Sena, Sawmtea leh Rozama
Mizo coach pathum F. Liandala (Sena) (North Mualcheng), B. Malsawmzuala (Luangmual), Lalrozama Fanai (Bawngkawn) te chuan Asian Football Confederation 'A' Licence coach an pass thar. Mizo zingah AFC A licence coach 10 an awm chiah.
Bahrain-a hna thawk Sena
North Mualcheng tlangval Sena hi Sporting Club de Goa, Prayag United, Rangdajied United FC, Chennai City, Aizawl FC, Minerva Punjab leh Mohammedan SC-ah te a khel tawh a, midfielder niin a rilru a fim ṭhin hle. Kum 2021-ah coaching licence nei ṭanin Sena hian Kerala United-ah bul a ṭan a, kum hnih Under 19 enkawlin, kum dang senior team a enkawl leh bawk. North Mualcheng coach hian December khan A Licence hi zoin Bahrain a pan a, GRO youth development project-ah head coach/director hna a chelh mek.
Sena chuan, "Kan hnathawh ve theih chhan hi, Pathian khawngaihna vang chauh a ni. Ka nu leh pa ten min thlawp ṭha em em a, ka nu leh pa bakah min duhsaktute ṭawngṭaipuina rah ka seng a ni," tiin Vanglaini a hrilh.
Man Utd laka goal khung tawh Sawmtea
Luangmual pa Sawmtea hi Mizo forward talent nei ṭha ber zinga mi a ni a, a naupan laiin Mohun Bagan aiawha khelin Nike Manchester United Premier Cup khel turin an inpettling. South East Asia-a an champion ṭumin Sawmtea hi best player a ni a, inelna lian zawkah inpettlingin, Manchester United lakah goal a khung hial. India aiawh pawhin Nepal-ah Under 14 inelnaah a tel a, Portugal-ah Under 17 inelnaah a tel leh bawk.
Sawmtea hian Mohun Bagan senior tan a khel zui a, Peerless SC leh Rangdajied United FC tana a khelh hnuin Mizoramah rawn kirin nupui a nei a, Mizoram pawnah a khel tawh lo. MPL-ah Sawmtea hian Aizawl FC, Ramhlun North, Luangmual leh Zo United tan a khel a, tualchhung football tinungtu zinga mi a ni. Aizawl FC youth team-ah coaching hna bul ṭanin, Calcutta Football League first divison club Kalighat Sports Lovers Association a enkawl tawh bakah I League-ah Aizawl FC senior team a enkawl tawh a, Mizoram mipa leh hmeichhe senior team a enkawl tawh bawk. Tunah hian Sawmtea hi Lushai Corner Football Academy-ah Head of Development hna a thawk mek.
Churchill coach Rozama
Bawngkawn tlangval Rozama hi centre back/left back a khel ṭhin a ni a, theihna a neihsan bakah sulhnu pawh a nei ṭha. Mohun Bagan-in Manchester United Premier Cup an khelh ṭum khan Sawmtea leh David Lalrinmuana te nen an kal ho a, ani erawh tlarhnung player pawimawh a ni.
Hemi hnu hian India camp-ah awmin kum 2010 khan Iraq-ah AFC U19 qualifiers leh Asian Games a khel a; kum 2007 khan Jeje Lalpekhlua nen Pune FC an zawm. Rozama hian Pune FC hnu hian Pailan Arrows, Mohun Bagan, Bengaluru FC, Aizawl FC, Fateh Hyderabad leh East Bengal tan a khel a, player ang pawhin tawnhriat nei ṭha hle.
Aizawla Tata Trusts - Centre of Excellence for Sports an din khan Rozama hian assistant coach hna a thawk a, COE tih tawp hnuah Aizawl FC enkawlin head coach Standly Rozario awm hmain senior team a enkawl hman. Bawngkawn tlangval hian Rajasthan United-ah Under 17 leh Kerala United youth team a enkawl tawh bawk. Tunah hian Rozama hian Churchill Brothers senior team a enkawl a, Goa Pro League an khel mek.