Beisei phak lo Liverpool tan beiseina?

Nipui transfer-a Liverpool an che tak tak kha chu, club dang fan-ten an mei an khup zal zal a, "Liverpool an champion leh ang em?" tih ai chuan, "Tuin nge Reds el phak ang?" tih chu zawhna a ni zawk.

Mahse, mihringte thlirlawk anga thil a thleng vek kher lo hi hringnun tingaihnawmtu a ni - kum 2026 a herchhuah meuh chuan Liverpool tan champion a beiseiawm lo a, season tharah Champions League an khel ang em, tih chu zawhna a ni ta zawk.

Reds hian zanin dar 1:45-ah Premier League match khel turin Sunderland an lenchilh dawn a, Arne Slot-a leh a naute tan vawi khat chak loh pawh a pawi thui tawh dawn.

Liverpool buaina

Reds-in nipui transfer-ah sum an hman nat viau rualin an ṭhatpui lem lo - nipuia an lakluh zingah Giovanni Leoni hi damdawi in lamah hun a hmang chawt a, Jeremie Frimpong lah a dam emaw tih laiin damdawi in pan a ngai leh ṭhin.

British transfer record fee-a lakluh Alexander Isak-a'n beisei a phak lo mai a ni lo, hliam vangin a chawl mek a, a khat tawkin damdawi in lamah Joe Gomez hming lam reng a ni a, Conor Bradley pawh a la dam lo!

Hei mai a ni lo - Reds hian nipui transfer-ah Trent Alexander-Arnold, Luis Diaz, Darwin Nunez leh Caoimhín Kelleher te ho an chhuahtir a, player lakluh lamah an tifuh lo a, chhuahtir lamah pawh an tifuh chuang lo a ni rih ber!

Buaina belhchhahna

Reds buaina belhchhah turin, tun season-a an player ṭha bera chhal ngam, Dominik Szoboszlai-a'n Manchester City lakah ṭul lo takin red card a hmu a, zaninah Hungarian midfielder a inlan thei dawn lo.

Slot-a'n right back pahnih Frimpong leh Bradley a chhawr thei lo a, an hmun ruak luahtu Szobo hrem a ni lehzel. Hei hian zanina Reds inrem dan tur hmuh a tichâkawm a, midfielder Curtis Jones hi right back-ah khelhtir mai a nih a rinawm.

Ibrahima Konate, Virgil van Dijk leh Milos Kerkez te ho an dam avangin tlarhnung dangah buaina a awm lo a, midfield-ah Alexis McAllister leh Ryan Gravenberch an inkawp leh bawk ang.

Harh a hun e

Tun season-a Liverpool tana goal khung hnem ber ni mek Hugo Ekitike-a'n goal 15 a khung tawh a, Liverpool ang club lian tan a la ṭha tawk lo - tlarhma player dangah goal 10 khung kai an la awm lo thung!

Mohamed Salah pawh tun season-ah goal ruk chiah a la khung a, a inhmeh lo! Cody Gakpo lahin season hmasa a phak lo a, player pahnih hian season hmasa an 'form' an phak leh thei a nih chuan Liverpool tan UCL khelh phak a zuamawm sawt ang.

Season ṭantira beisei phak lo Florian Wirtz-a'n ngai a awh chho ṭan. Mahse, Manchester City laka a goal khung loh enin, "Goal hi mawi taka khung kher a ngai lo, a goal chuan a tawk," tia hrilhtu a mamawh tih a lang!

Black Cats chu

Sunderland hi Premier League kai thar ni mah se, Liverpool tan a awlsam dawn lo. Anfield-a an intawn hmasakah pawh 1-1 in an lo inhnehtawk tawh a, Sunderland khelmualah Reds tan beisei tihsan a harsa.

Hetihrual hian Black Cats-in beisei phak baka season an hman theih nana player ṭangkai, midfielder Granit Xhaka chu hliam vangin a la inlan thei dawn lo a, Liverpool ṭantu tan chuan lawma zuanna tham a ni.

Régis Le Bris-a team hian tun hnaiah beisei ang result an nei lo ve bawk. An league match hnuhnung pakuaah vawi hnih chiah an chak a, vawi thum tlawmin, vawi li draw an nei a, an chak loh chuan Reds tan mualphona tawpkhawk a ni ang.