Santosh Trophy final-ah Services leh Kerala

79th National Football Championship for Santosh Trophy 2025-26-ah Services leh Kerala ten February 8, Pathianni chawhnu dar 1:00 hian final an khel dawn. Inkhel hi FIFA+ ah a thlawnin a en theih a, broadcast lam buaipuitute hi Basanta Meisnam leh a naute an ni.

Services hian semfinal-ah Abhishek Pawar goal hnih hmangin Railways 2-0 in an hneh a, Kerala hian Punjab 4-0 in an sawp thung. Railways laka goal khungtu Abhishek Pawar hian quarterfinal-a champion lai West Bengal an hneh ṭum pawhin penalty shootout-ah chakna goal a khung tawh bawk. Abhishek hian nikum khan army a zawm chauh a, hemi hma hian Bengaluru club Kickstart FC tan a khel ṭhin.

Services-ah Mizo tlangval pahnih Ramhlun Vengthar tlangval H. Lalhmingchhuanga leh Ramhlun South tlangval Samuel K. Vanlalpeka te an tel a, semifinal-ah inkhel bul ṭan ve vein midfield-ah hmun pawimawh an chang. Hmingchhuanga hian 2018 BC Roy Trophy leh 2019 Under 21 Dr TAo Football-ah Mizoram a champion pui a, kum 2019 tawp lam khan Madras Engineering Group (MEG) a zawm a, kumin hi Services tana a khelh vawi khatna a ni. Samuel hi Air Force lam a ni thung a, kum 2024 khan Agniveer (sports quota) hmangin Air Force hi a zawm a, kumin hi Services-a vawi khat telna ve tho a ni.

Tun ṭuma Services ṭhatna chhan tak erawh 2023-24 season-a Santosh Trophy leh National Games-a champion puitu coach Govindaraju Ramachandran a rawn kir a, nikuma an hneh loh West Bengal laka phuba an lak bakah final an lut bawk.

Kerala pawhin team ṭha an nihzia nemnghetin inelna hnuhnung pangaah a vawi thum nan final an lut. Dhakuakhana Football Stadium-a inkhelah Kerala-in Punjab lakah a khat mawi tawkin goal an khung a, minute 16-naah Muhammad Ajsal-a'n goal hmahruai a khung hnuah Muhammed Riyas leh Viknesh M ten first half-ah an khung belh. Punjab-in 2018-19 season hnuah a vawi khat nan final lut tum mah se Kerala lakah an che thei lo a, Kerala tan Riyas-a'n minute 83-naah khungin, 4-0 in coach Shafeeq Hassan Madathil hoten hnehna an chang.

Kumin Santosh Trophy final round hi Assam-ah khelh a ni a, Mizoramin final round an thleng pha lo. NorthEast aṭanga final round inpettling Meghalaya leh Nagaland ten group stage an paltlang lo a, a thlengtu nih vanga final round lut Assam erawh quarterfinal lut mah se Kerala hneh loin an tla. Chutihrualin Chanmari pa R. Malsawma (Asoma) chu match commissioner-ah a ṭang a, Mizote khelmual pawn lamah pawh an inzar pharh ve zel.