Goretzka-a'n Arsenal a hnar

Bayern Munich midfielder Leon Goretzka chuan thlasik transfer tawp ni khan Arsenal sawmna a hnar a, a contract hman zawh phawta a hma lam hun chu tihchian a tum niin German media-ten an tarlang.

Kum 30 mi midfielder hian nipui zawh rualin Bayern-ah a contract a hmang zo tawh dawn a, German club-ah hian cham chhunzawm a tum tawh lo - a duh lam zawm turin zalenna a nei dawn.

Premier League champion tum Arsenal chuan hei hi hre fuhin, an rim chat a, mahse, kum 30 mi midfielder hian season laklawha club khelhna sawn ai chuan nipui transfer-ah, muangmara thutlukna siam a tum zawk niin an sawi.

Germany tan vawi 67 inlana goal 15 khung thei Goretzka hian tun season-ah Bayern tan match 28 khel tawhin, goal khat a khung a, nomawi chawi theih ang zawng zawng a chawi kimna club hi nomawi chawi chung ngeia thlah leh phawt a duh ni te pawhin a lang.

Goretzka hian nipui transfer-a a pan theih zingah Premier League hi a dah tel nia sawi a ni a, Arsenal hian an dawr nawn a nih chuan season thara Gunners player ni thei dinhmunah chuan a la ding tho.

Arsenal hian tun season-ah inelna pali an telnaah chuan nomawi an la beisei vek! Kar laihawlah khan Chelsea chu 1-0 a hnehin League Cup final an lut a, Champions League leh FA Cup-ah beisei an la nei a, Premier League-ah hmahruaitu an ni mek bawk.

Gunners hian zanin dar 8:30-ah league match khel turin Sunderland an mikhual dawn a, an player hlui Granit Xhaka hoa team hmuhnawm tak dintu Black Cats lakah fimkhur a ngai dawn.

Arteta naute hian EPL-ah hian anmahni hnaih bertu City aiin point rukin an hmu tam zawk a, zaninah an chak chuan Pathianni zana inlan tur Manchester City tan pressure an siam thei ang.