Hma kan sawn - Rosenior

Chelsea boss Liam Rosenior chuan League Cup semifinal-ah Arsenal paltlang thei lo mah se, a club enkawl chuan hma an sawn thu a sawi.

Rosenior chuan, "Second half-ah kan tum hlawhtlingin, kan duh laiah inkhel kan thunun thei a, mahse, a hmawr bawkna tak kan tithei ṭhin lo. Hun tawp lama kan nawr anga nawr kha chuan, goal chhuah palh hi chu thleng ve thei a ni.

"Arsenal khan min hmachhawn kha a awlsam an ti lo ang tih ka ring a, hma kan sawn hle. Chak loh chu a hrehawm a, a pawimawh ber erawh tun anga hma kan sawn zel hi a ni," a ti.

English coach chuan first leg-a an chak loh chungchang sawi chhuakin, "First leg-ah kha chuan ni thum chiah team ka la enkawl hman a, kan camp-ah hri a leng a, player pali ngawt ka chhawr thei lo bawk.

"Chuvangin first leg-a kan result-ah khan kan naute ka dem thei lo. A pawimawh ber chu hei hi a bul ṭanna chauh a ni tih kan hriat a ngai a, ka thil hmuh tam tak avang hian ka lawm hle," a ti.

Chelsea hian Inrinni zanah Premier League khel turin Wolverhampton Wanderers an lenchilh zui dawn. Rosenior chuan, "Result lawmawm tak hawn ngei chu kan duh a, tuna tana pawimawh erawh kan hahdam phawt a, hmasawn zel tura beih zui a ni," a ti a, bul an la ṭan chauh thu a sawi.