Serie A : Cremonese mikhual tur hmahruaitu Inter

Serie A table hmahruaitu Inter Milan chuan Pathianni zan dar 10:30-ah Jamie Vardy telna Cremonese an hmachhawn dawn a, Inter hi Champions League-a chak zo hlim an nih bakah league match hnuhnung berah goal ruk an khung a, an phur vanglai an ni. Anmahni hnaih bertu AC Milan nen an inthlauhna point ngain a zauh belh tawh a, an inkar tihzau belhchhah an tum ang.

Inter Milan tan midfielder Hakan Calhanoglu a la inkhelh theih hmel loh a, a aiah Piotr Zielinski a luh leh a rinawm. Turkey International Calhanoglu hi a chawn hliam avangin Champions League-ah pawh match hnih a inlan tawh lo.

Calhanoglu bakah Marcus Thuram a inlan thei dawn lo bawk a, Thuram hian Nilaini zan UCL-a Borussia Dortmund an hneh ṭum khan a malpuiah hliam a tuar. Inter tan tun hnaia che ṭha tak Pio Esposito leh Ange Bonny te an awm a, anni bakah hian an chhuanvawr Lautaro Matrinez a dam ṭhat avangin tlarhma lamah hlauhthawnna tur a awm lo.

Argentine International Martinez hian tun season Serie A-ah goal 12 a khung tawh a, a ni aia khung hnem an awm lo. Champions League-ah pawh goal li a khung tawh a, forward hlauhawm ber zinga mi a nih avangin eng team pawhin hmachhawn an chak lo ang.

Cremonese tan Jamie Vardy a dam leh tawh a, English forward hian inkhel bul a ṭan loh pawhin bench-ah a ṭhut a rinawm. Vardy bakah hian Federico Bonazzoli a awm dawn a, player pahnihte hian league-ah goal nga ve ve an khung tawh avangin Inter tan zuam sual theih an ni.