Hmahruaitu Bayern an tlu hlen dawn em?

Tlawm nei loa match 18 lai an khelh hnuah Bayern Munich-in Augsburg 2-1 in an hneh lo a, anmahni hnaih bertu Borussia Dortmund nen an inthlauhna point riat lai ni mah se Vincent Kompany nauten tlawm nawn an duh dawn lo a, zanin dar 11-ah Hamburger SV khelmual an pan ang. Bayern tan chawn hliam avangin Konrad Laimer a khel thei dawn lo a, player dang an dam kim thawkhat.

Bavarians tan Harry Kane chu an hmachhuan a ni leh dawn a, English forward Kane hian tun season inelna hrang hrangah goal 34 a khung tawh a, Bundesliga-ah ringawt goal 21 khung tawhin a ni aia khung hnem an awm lo. Nilaini zana UCL match an khelhah chakna goal a khung bawk a, Kane-a phur vanglai a ni.

Kane hian Bayern tan inelna hrangb hrangah match 126 khel tawhin goal 119 a khungsak tawh a, Bavarians a zawm hnuah a chet ṭhat avangin German champion hian chelh an duh a, contract ziahpui tumin an dawr mek.

English forward Kane thlawp tur hian Michael Olise, Lennart Karl, Serge Gnabry leh Luis Diaz te an awm leh thei dawn a, khawvela hmatawng hlauhawm berte zinga mi an ni.

Anni bakah hian Jamal Musiala a lo kir leh tawh a, hliam vanga ni 200 dawn a inkhelh theih loh hnuah Musiala hian inkhel bul a ṭan vawi khatnaah goal a khung nghal a, a thiam ngaiin a la thiam reng tih lantirin Bayern tlarhma a tihriam sawt ang.