Europa League Playoff khel tur Nottingham an chak

UEFA Europa League group stage chu Ningani zan khan khelh zawh a ni a, club 36-ten a ruala match khel vekin last 16 khel tur, knockout playoff khel tur leh tla turte a chiang. Premier League club zingah Aston Villa-in pahnihna dinhmun luahin last 16 an lut a, Nottingham Forest-in Ferencvaros 4-0 a hnehin 13-naah awm a, playoff an khel dawn.

City Ground-a inkhelah Forest tan Igor Jesus a langsar a, Jesus hian goal hnih a khung. Ferencvaros midfielder Bence Ötvös-a'n an lama a tihluh bakah James McAtee-a'n penalty aṭangin a khung bawk a, nuamsa takin an mualah Forest an chak.

Sean Dyche-a naute hi EPL lamah an che ṭha tawk lo a, table-ah 17-naah awmin relegation zone-a awm West ham aiin point nga chiahin an hmu tam zawk. Europa League-a an chet dan hi Premier League lamah pawh chhawm an duh ang.

Forest hian point 14 hmuin table-ah 13-naah an awm a, last 16 lut turin knockout playoff an khelh a ngai dawn. Premier League club pakhat zawk Aston Villa pawhin RB Salzburg laka goal hnih an chhuah hmasas hnuah Morgan Rogers, Tyrone Mings leh Jamaldeen Jimoh te goal hmangin 3-2 in an lehthal.

Villa hian point 21 hmuin pahnihnaah an awma, table hmahruaitu Lyon nen an point hmuh zat inangin goal difference-ah an phak lo. Villa hi chak lo pawh ni se a sang pariat zingah an awm dawn tho a, Europa League khelh mekah team ṭha berte zinga mi an ni.

Europa League table-a a sang pariatin direct-in round of 16 an lut nghal a, February-ah match khelh tur an nei dawn lo. Pakuana aṭanga 24-nain playoff khelin hmun ruak pariat an inchuh leh ang.